Өзекті мәселелер талқыланған кездесу

Еуразиялық экономикалық одақтың Үкіметаралық кеңесінің отырысына қатысу үшін Ресейдің Сочи қаласына барған Қазақстан Премьер-Министрі Кәрім Мәсімов кеше Ресей Үкіметінің Төрағасы Дмитрий Медведевпен кездесті. Осы сапарының алдында К.Мәсімов ресейлік әріптесімен кез­десуде Қазақстандағы жұрт­шылықты көптен мазалап жүрген маңызды мәселе – Кенесары хан мен Кейкі батырдың бастарын елге қайтару жайын қозғайтынын хабарлаған еді. Премьер-Министр айтқанында тұрды. Ресей Үкі­метінің Төрағасы бұл мәселені анықтап, өтінішті орындау үшін қажетті тапсырмалар беретінін айтты. «Мен ауызша және егер қажет болса, жазбаша тапсырма беріп, бұл мәселенің анық-қа­ны­ғын анықтаймын», – деді Д.Мед­ведев. Кездесу барысында, сондай-ақ, Астанада өтетін XIII Өңіраралық ынтымақтастық форумына қатыс­ты мәселелер де талқыланды. Атап айтқанда, Батыс Еуропа – Батыс Қытай секілді ірі көлік жобаларын жүзеге асыру барысы сөз болды. Жайық трансшекаралық өзеніне қатысты тақырыпқа баса назар аударылды. Қазақстан Премьер-Министрі бұл мәселе жөнінде үкіметаралық келісімге қол қоюды ұсынды. Сонымен қатар, логистика, шекара маңы ынтымақтастығы және нақты экономика саласындағы басқа да маңызды мәселелер тал­қыға салынды. «Егемен-ақпарат»