Ломбардта қамалып қалған күдікті полицияға өз еркімен берілді

Астана қалалық ішкі істер департаменті баспасөз қызметінің жетекшісі Софья Қылышбекованың хабарлауынша, ломбард тонамақ болған күдікті ұсталған. «Күдіктінің Астана қаласының тұрғыны екені анықталды. Ол 1979 жылы туған. Оның мұндай қадамдарға не үшін барғанын нақты айта алмаймыз, тергеу амалдары кезінде бәрі белгілі болады. Қазіргі таңда ломбардтың екі қызметкері қарақшының қолынан аман-есен босатылды. Келіссөздердің барысында күдікті өз еркімен полицияға берілді. Ең бастысы ешкім де зардап шеккен жоқ», – деді Софья Қылышбекова. Сонымен қатар, ол ломбардқа мүліктік зақым келмегенін, күдіктімен арадағы келіссөздер телефон арқылы жүргізілген айтты. Айта кетейік, бүгін Кенесары көшесінде орналасқан М-Ломбардты тонауға әрекет жасалған болатын. Қарақшы ғимарат ішіне басып кіру кезінде дабыл тетігі іске қосылып, есік автоматты түрде құлыпталып, іште күдікті және екі ломбард қызметкері қамалып қалған-ды. Полицейлер бұл ешқандай лаңкестік әрекетке қатысы жоқ, тек тонау оқиғасы екенін мәлімдеді. Талғат РАЙЫМБЕК