Халықаралық байқауда екінші орын иеленді

Ресейдің Алабино полигонында «Армия халықаралық ойындары-2016» аяқталды. Қазақстан Қарулы Күштерінің құрамасы сайыстарды табысты аяқтады. Біздің әскери қызметшілер Азия, Еуропа, Африка және Латын Америка­сының 19 мемлекетінен келген 120 армиялық команданың арасында жалпыкомандалық екінші орынды иеленді. Бірінші орынға Ресей командасы шықса, үшінші жүлдеге Қытай құрамасы ие болды. Біздің команда бірден-бір өкілді команда деп танылды. Атап айтқанда, ойындарға қатысу саны жағынан сайыс­ты ұйымдастырушы команда мен Қытай командасынан кейін тұрды. Қазақстандық әскерилер 23 байқаудың 21-іне қатысты. Бұл ауқымды қатысу Қазақстан армиясының жаңа мүмкіндіктерін көрсетті. Қазақстанның Қорғаныс ми­нистрі Иманғали Тасмағамбетов атап өткендей, биылғы жылы «Ар­мия халықаралық ойындары» өзі­нің мазмұны мен ауқымдылығы жағынан ерекшеленіп, халықаралық ынтымақтастықтың жаңа символына айналды. Тәжірибе алмасу, бейбітшілік пен келісімнің кепілі ретінде танылды. Қазақстан ойын­дарға қарапайым сайыс ретінде ғана қарамайды, сонымен қатар, жарыс жауынгерлік бауырмалдық рухын көтереді деп санайды. Ресейдің барлық аймағын­дағы 19 әскери полигонда құрлық­та, теңізде және әуеде Қазақстан Қарулы Күштерінің намысын 600 әскери қызметші қорғады. Әскери ұшқыштар, теңізшілер, десантшылар, жүргізушілер, танкистер мен инженерлер, кинологтар, әс­кери дәрігерлер және аспазшы­лар – барлығы халықара­лық дәре­­­же­дегі біздің әскеріміздің ай­­бы­нын асыру үшін күресті. Он­даған сағаттар жаттығуларда өтіп, жүздеген қашықтықтар мен кедер­гі­лерді еңсерді. Нәтижесінде жалпы­командалық екінші орын жүлдесімен «Теңіз кубогында» әскери теңізшілер, «Сенімді дос» байқауында кинологтар, «Десантты взвод» және «Инженерлік формула» байқауларында тиісінше десантшылар мен инженерлер жеңімпаздар ретінде елге оралды. Сондай-ақ, «Танк биатлоны», «Эльбрустік шеңбер», «Рембат», «Қару шебері», «Дала асханасы» және «Автобронетанкті техника шебері» байқауларында жүлделі үшінші орынды жеңіп алды. Аталған ойындардың жарқын сәттерінің бірі – жеке есепте ал­дыңғы орынға шығып, 699 балл жинаған қазақстандық әскери қыз­метші Бауыржан Мұқышев үздік кинолог деп танылды. «Суворов тегеуріні» бай­қауы біздің команда үшін жеңісті болды. Құрамында жауынгерлік маши­на командирі аға лейтенант Марат Мауенов, оператор-бағдарлаушы сержант Жақсылық Ескендіров, механик-жүргізуші сержант Сәттібек Бекбаулин бар команда ең үздік деп танылды. Қазақстан үшін «Армия ойындары-2016» байқауының тағы бір ерекшелігі – алғаш рет «Артил­лериялық ату шебері» және «Мерген шебі» екі байқауы біздің жерімізде өтті. 12 мемлекеттің үздік мергендері мен артиллерия­шылары жеңіс үшін сайысты. Байқаудың алғашқы кезеңдері түнгі жағдайда өтті. Атыстарды елімізде шығарылған түнгі көру құралдары қолданылды. Бұл Қазақстан жеріндегі Армия ойындары тарихының басы ғана саналады. Келесі жылы біздің әскери полигондар тағы да әскери мамандар сайысының орталығына айналады. Енді бізде екі емес, бес сайыс өткізіледі. Армия ойындары­ның бағдарламасына бронды авто­машиналардың сайысы, әскери қызметші қыз-келіншектерге ар­налған сайыс, басқарусыз ұшақ­тардың қатысуымен байқаулар қосы­лады. Сондай-ақ, биыл елімізде өткен  «Артиллериялық ату шебері» және «Мерген шебі» байқаулары ұйымдастырылады. Сәулебек БІРЖАН