ДҮБІР

Спорт бірлігімізді бекемдей түседі

Астанадағы Назарбаев Университетте «Спорт – бейбітшілік пен келісім жолында» ұранымен ел Тәуелсіздігінің 25 жылдығына арналған «Олимпиадалық жаз – Ел рухы» фестивалі ұйымдастырылды. Қазақстан халқы Ассам­блея­сы мен өзге де тиісті ведомство­лардың ұйытқы болуымен алғаш рет өткізіліп жатқан мере­келік шараның басты мақсаты – олимпиадалық қозғалыс белсен­ділігі мен жеңіс рухын дәріптеу, саламатты өмір салтын ұстануды насихаттау. Сондай-ақ, ел ішінде командалық рух пен достық құн­дылықтарды қалыптастыру, жас­тарды спортпен айналысуға тарту. Әрі ең маңыздысы, осы күндері әлем назарын өзіне аударған Рио-де-Жанейродағы Олимпиадаға қатысу­­шы Қазақстан құрамасының спорт­шыларына қолдау көрсету. Салтанатты шара аясында сөз алған Қазақстан халқы Ассам­б­леясы Төрағасының орынбасары – Хатшылық меңгерушісі Ералы Тоғжанов республикалық деңгей­де ұйымдастырылып отырған осындай фестиваль арқылы ке­мел келешегіміздің кепілі – бүгін­гі жастарымызды са­ламатты өмір салтын ұстануға мейлінше бау­ли отырып, олардың бойында отансүйгіштік қасиет қалып­тас­тыру екендігін атап көрсетті. «Төрткүл дүниенің көңіл қойып, көз тігіп отырған Рио Олим­пиа­дасында біздің бауырымыз, замандасымыз Данияр Елеусінов қоржынымызға тағы бір алтын салды. Бұл – зор қуаныш, ерекше абырой. Ол Әнұранымызды әлемге тыңдатты. Сондықтан да оны және өзге де спортшыларымызды бүгінгі жастарымызға үлгі тұтып, кейінгі толқын өкіл­дері­не өнеге етіп көрсетуіміз керек. Назарбаев Университеттің салынып, жастарымыздың әлемдік деңгейдегі осындай оқу орнында білім алуына жағдай жасалуы – Елбасымыздың оларға деген ерекше ықылас, пейілі мен зор үмітінің көрсеткіші. Ал енді «Олимпиадалық жаз – Ел рухы» шарасы аясында жастар арасындағы ырыс-ынтымақ пен бейбітшілік­ті насихаттайтын фестивальдар бұдан кейін де жалғасын табатын болады. Әркез белсенді болып, спортты серік етейік»,– деді Ералы Лұқпанұлы. Екі күнге созылатын фестивальда спорттың 7 түрі бо­йынша: қазақ күресі, тоғызқұмалақ, таэк­вондо, волейбол, үстел тенни­сі, мини-футбол және армрестлинг­тен (қоссайыс) жарыстар ұйым­дастырылды. Оған қатысушы­лар ретінде еліміздің барлық өңір­лерінен бір-бірден командалар келген. Олар өз облысынан Риоға аттанған спортшыларын үлгі ете отырып, спорттық сайыс­қа түсті. Командалық топ ретінде жасақталған жарыс жеңімпаз­дары кездесу соңында арнайы сыйлықтармен марапатталды. Айта кетейік, бұл шара дәстүрлі және ұлттық спорт түрлерін насихаттау арқылы дүйім жұрт ішіндегі достықты тереңдету мен өзара сенімді нығайтуға негізделген. Сондай-ақ, фестивальдың түпкі бір тамыры – жастарды мейлін­ше белсенді өмір сүріп, спорт­қа жақын болуға баулуда жатыр. Тіпті, мүмкіндігі шектеулі жас­тарды үмітін үзбей, қоғамға еркін бейімдеуге барынша үндейді. Осындай ойдың үдесінен шығу үшін фестивальға Ардақ Отарбаев та арнайы шақырылған. Арба­дағы спорттық би түрінен әлем чемпионатының қола жүлдегері атанған ол: «Спорт – ұлт бірлігін нығайтатын тегеурінді күш», дейді. Ол мұнымен шектелмей, тағ­дыр тәлкегіне ұшырап, мүмкіндігі шек­теулі жандар санатына қосыл­ған жастарға күш-жігер беретін әрі оларды табандылыққа үйрететін де осы спорт екендігін айтады. Ел жастарының рухын көтеріп, ұйымшылдық пен бауырмалдыққа  шақыратын бұл шараға Парламент Мәжілісінің депутаттары мен ҚХА өкілдері, мемлекеттік органдардың және этномәдени бірлестіктердің мүшелері қатысты. Ал Назарбаев Университеттің спорт кешенінде өткен спорт түр­лерінен сайыс жеңімпаз­дарын марапаттау сәтінде көрермен­дер назарына этномәдени бір­лес­тіктердің ұлттық ойындары мен «Strееt-worкоut» спорт­шыларының көр­некі қойылым­дары ұсынылды. Нұрлыбек ДОСЫБАЙ, «Егемен Қазақстан» Суретті түсірген Ерлан ОМАРОВ, «Егемен Қазақстан»

Қазақтың алтын салмағы

Алпыс тоғыз қазақтың, Еншілеп алған салмағы. Төртінші Олимп ерлерім, Тұғырға мығым қонғалы.   Бақтияр, Бақыт, Серіктің Данияр жолын жалғады. Дәстүрін елдік ерліктің, Жаралы батыр қорғады.   Данияр, ұлым, жарадың, Жігітсің нағыз, қарағым. Еліңнің туын көтеріп, Жаңарттың ізін ағаңның.   Қазақтың алтын салмағы, Ерлерім сені қорғады. Он алты жыл біздерге Тең келер ешкім болмады.   Жігітсің нағыз, Данияр, Бойында намыс, ары бар. Мараттай әке өсірген, Қазақтың ұлы, бағы бар.   Төгілген терің ақталды, Сенімен халқың мақтанды. Қазақтың алтын салмағы, Дәстүр боп шыңға аттанды.   Толқыдың, елім, шаттанып, Ұлыңмен ерен мақтанып. Ерліктің алтын дәстүрі Қалады мәңгі сақталып. Мыңжасар ДӘРМЕНОВ Арыс қаласы

Қуаныш құшағындағы Қайыңды

Сәрсенбінің сәтті күні ымырт үйіріле Теректі ауданынан іссапар­дан оралып келе жатыр едік. Облыс орталығына жақындаған кезде автокөлік рүліндегі Арман есімді жүргізуші: «Бүгін түнде Қадыр Мырза Әлі атындағы мәдениет және өнер орталығындағы алаңда жерлесіміз Данияр Елеусіновтің финалдық айқасы тікелей эфирден көрсетіледі», деп қалды. Құлағымыз елең етті. Иә, аталған алаңға үлкен табло – экран қойылған. Елдің абы­ройын асқақтату үшін  белгілі бокс­шы ақ тер, көк тер болып, сайысқа түсіп жатқанда ұйқы болу­шы ма еді?! Біз де келдік, түн ор­та­сына таман алаңға. Мұнда Данияр­ға тілектес жастар мен сту­дент­тер көптеп жиналыпты. Даниярдың туып-өскен ауылы Қа­­йың­­ды не күйде екен қазір? Көз шы­рымын алар-алмастан таң сәрі­де сол ауылдың әкімі Болат Төлеуі­шов­ке қоңырау шалдық. Ауыл тұр­ғындары өз перзенттерінің Рио Олимпиадасының финалдық сайыс­тағы ұрысы біткенше көз ілмепті. Жерлесінің жеңісіне елден ерек қуанғандар­дың бірі Даниярдың әкесі Марат Тәліп­ұлының төл шәкірті – Қайың­ды ауылындағы бокс секция­сы­ның жат­тықтырушысы Марат Мұхамбетов болды. «Біз Данияр­дың бір ауыл ғана емес, бүкіл елі­міздің мәрте­бесін биікке көтеріп, алтын медаль алғанын мақтан тұтамыз», деді ол бізбен телефон арқылы тіл қатысқан сәтінде. Ол сонымен бірге Олимпиада чемпионын елорда әуежайынан қарсы алу үшін Астанаға шұғыл жол жүргелі тұрғанын да жеткізді. Даниярдың туған ауылы Қайың­ды Ресейдің Саратов облысына сұғына орналасқан. Бұрын Березин деп аталған. Кеңестік кезең­де егін егіп, мал бағып, еңбек­қорлық үлгісін танытқан әрі мәдениетін барынша өркендеткен ауылдан Олимпиада чемпионы шығуы – үлкен мақта­ныш. Осы қуанышқа ақтарыла қуанған Қайыңды қазір той құшағында тұрғандай әсер қал­дырады. Мұндағы жұрт өз жер­лестері қатарынан енді Даниярдың жетістігін қайталауға ұмтылатындардың көптеп табылатынын да айтып отыр. Темір ҚҰСАЙЫН, «Егемен Қазақстан» Батыс Қазақстан облысы, Казталов ауданы, Қайыңды ауылы

Алматы ауыр атлеттерді қарсы алды

Бұрнағы күні түнде Алматы жанкүйерлері тағы да әуежайға қарай ағылды. Олар түнгі сағат 01. 30-да Амстердамнан келетін әуе лайнерінің жолын тосуға әдеттеніп алды. Бүгін де солай, осы рейспен Қазақстан ауыр атлеттері Александр Зайчиков пен Денис Уланов келуі тиіс. Жанкүйерлердің бүгінгі көңіл-күйі тым ерекше... Бұл – Алма­ты жанкүйерлері Қазақстанның Олим­пиададан алған үшінші ал­­тын медалін теледидардан көріп, бокс­шыларымыздың коман­да­лық көшбасшысы Данияр Елеу­сінов­тің ғажап жеңісіне куә болып, қуаныштан жүрегі жарылып тұрған сәті еді. Александр Зайчиков топ бас­тап әужайдың VIP-залына бас сұққаны да сол, екпіндеген дом­быраның үнімен Сыр бойынан келген жыршы жігіт мадақ-арнаудың тиегін ағытып жіберді. Осы бір көріністен-ақ жүлдегер жігіттің  Сыр елінен, атақты Илья Ильиннің із­басары екенін  аңғару қиын емес-тін. Жыр біткенде алып Александр анасының құша­ғына күмп берді... Олимпиада қола жүлдегерін құшағынан босатқан бақытты ана  Маргарита Зайчикова сол бойда журналистерге сұхбат берді. – Менің ұлым үшін ішкен астарын жерге қойып жанкүйер болған қазақстандықтарға аналық жүрегіммен алғысымды айтамын. Александрдың жүлделі үшінші орын алғаны бізге алтын медаль алғандай әсер етті. Еліміздің көк туы жүлдегерлердің жалаулары­мен қатарласып жоғары көтеріл­генде, көз жасымды тыя алмай қал­дым. Ұлым жеңіске отан­дас­тарымыздың қолдауымен жетті деп ойлаймын. Бәріңізге, бәріңізге рахмет!.. Жүлдегердің анасының шуақ­ты сөзін соңғы алтынның буы­мен масаттанып тұрған жинал­ған қауым жылы қабылдап, думан­датып ала жөнелді. «Алға, Қазақ­стан! Алға, Қазақстан!..» Александр Зайчиков – 2015 жылғы  әлем чемпионы әрі сол жылғы Ресей Президенті кубогі үшін жарыстың жүлдегері. 2012 жылғы Лондон Олимпиадасына қатысқан. Онда 105 килограмм салмақ дәрежесінде күш сынасқан Александр 360 (155+205) кг көр­сет­кішпен 12-орында қалған еді. Енді осы салмақта Риода бәсе­кеге түс­кен ол қоссайыс қорытын­ды­сы бойынша 416 (193+223) кг мөл­шер­мен қола жүлдеге қол жеткізді. Александрдың әріптесі Денис Уланов 85 кг салмақ дәрежесінде 390 (175+215) кг көтеріп, жарысты 4-орынмен аяқтады. Әуежайдағы шаттанған қауым­ға қарап Денис: –  Мен төрешілердің шешіміне дау айта алмаймын. Қатты шаршадым. Аздап тынығып алған соң, дайындықты қайтадан бастаймын. Менің алатын алтыным да, күмісім де алдағы күннің еншісінде, – деді спортшыға тән жігерлі сеніммен. Жеңімпаздарды қарсы алып үйренген алматылық жанкүйер қауым спортшының бұл айтқан­дарына иланғандай болды. «Жарайсың, Денис! Біз саған сенеміз!» деді дауыстап. Өз кезегінде ауыр атлеттеріміз «Алдымызда – Токио!» деп қол бұлғады. Әуежай думандатқан жан­күйер­лер шапалағының астында қалды. Талғат СҮЙІНБАЙ, «Егемен Қазақстан» АЛМАТЫ