Иран инвестициясы игілік әкеле ме?

Кез келген өңір инвестициялық қаражат есебінен өсіп-өркендеп дами алады. Сондықтан да бұл мәселеге Батыс Қазақстан облы­сының әкімі Алтай Көлгінов айрықша мән беруде. Оның қазіргі нәтижелері де көңілге қонады. Соның бірі Орал өңірі мен Иран Ислам Республикасы арасында сауда-экономикалық, инвестициялық және көлік-логистикалық салада жасалған ынтымақтастық жөніндегі келісім болып табылады. Аталған келісімге өткен шілде айының аяғында Тегеранда қол қойылған болатын. Өз кезегінде ирандық өкіл-инвестор Таваколь Иб­раими Орал өңірінде болған сапа­рында мұнда екі кезеңнен тұра­тын жылыжай құрылыстарын жүргі­зу үшін Иран тарапы инвести­ция құюға әзір екендіктерін мәлім­деді. Жұмыста голландиялық техно­ло­гияны қолдану белгіленген. Оның ерекшеліктері жөнінде  нидер­ланд­тық Андриес Копперт айтып берді. Яғни, оның мәлімдеуінше, жо­баның алғашқы кезеңінде құрылыс аумағы қырық гектарды құрамақ. Болашақта жылыжайдан жиналатын өнім мөлшері өңір тұрғындарының сұранысын қамтып қана қоймай, оны көршілес Ресей еліне экспортқа шығаруға болады деген болжам жасалып отыр. Қазақстан Еуразиялық экономикалық одақтың құрамында болғандықтан, мұндай жағымды жайт Ресеймен сауда-экономикалық қарым-қатынастарды одан әрі тереңдете түсуге септігін тигі­зеді деп күтілуде. Айтылар ой­ды бұ­дан да гөрі ашыңқырап айтқан­да, Қазақ­станның аталмыш эконо­ми­калық кеңістікте орналасуы иран­дық инвесторлардың қызығу­шылығын одан әрі күшейте түскендей көрінеді. Тіпті, қазіргі күні ірі де күр­де­лі жылыжай жобасының ор­ны бел­гіленіп те қойыпты. Айта­лық, «Орал» әлеуметтік-кә­сіп­керлік корпорациясы өңір­дегі индустриялық аймақты құруға бел шеше кірісіп, оның орнын белгілеген болатын. Бұл орын Теректі ауданындағы Пой­ма темір­жол бекетіне таяу орна­ласқан. Ирандықтар мен голлан­дия­лықтар бірлесіп қолға алатын жылыжай құрылысы дәл осы арада бой кө­термек. Өз кезегінде «Орал» ӘКК аталған шетелдік компаниямен бірлесіп жұмыс жүргізбек. Осы орайда мердігер ретінде белгі­лен­ген «KGS» компаниясы құны 176 миллион АҚШ долларын құ­райтын құрылысты алдағы бір ай­дың ішінде бастап кетуге бел буып отырғаны үлкен сенім туғызады. Мемлекет басшысы Нұрсұлтан Назарбаев еліміздегі атқарушы ор­ган жетекшілеріне инвесторлар үшін қолайлы жағдайлар мен мүмкіндіктер туғызуды басты міндет етіп қойғаны мәлім. Жоға­рыда көрсетілген жайттар Орал өңірінде бұл істің қалыпты деңгейде екенін көрсетеді. Сонымен, Иран инвестициясы Орал өңіріне игілік әкеле ала ма?  Бұл сауалдың жауабына уақыттың өзі төреші болмақ. Темір ҚҰСАЙЫН, «Егемен Қазақстан» ОРАЛ