Биылғы Тамыз кеңесінің тақырыбы – «Білімді ел – Мәңгі ел!» Болашаққа ұмтылған ұлттың ұрпағы ұятқа қалмауы үшін, ең алдымен, білімді болғаны абзал. Осындай ұстанымды ұран қылып ұстаған Білім және ғылым министрлігі келелі кеңесті жыл сайын жалғастырып келеді. Биылғы басқосудың атап айтар айрықша тұстары көп. Жетістіктері жетерлік.
Кеңес аясында Білім және ғылым министрлігінің Жоғары және жоғары оқу орнынан кейінгі білім департаменті «Үш тілде оқыту: қазақстандық тәжірибе және шетелдік үлгілер» тақырыбында панельдік сессия өткізді. Ондағы мақсат – жоғары және жоғары оқу орнынан кейінгі білім саласында үш тілде оқытуды қалыптастыру, оның ішінде ағылшын тілін меңгерудің деңгейін жетілдіру, алдыңғы қатарлы педагогикалық теорияны және пәндерді ағылшын тілінде оқытудың практикалық әдістерін игеру, тағысын-тағылар.
Мамандық даярлаудың маңызын түсінген кеңеске келушілер «Академиялық ортадағы инновациялар кадрларды даярлаудың сапасын арттырудың факторы ретінде» деген тақырыпта бәтуәлі басқосу өткізді. Оның негізгі мақсаты кадрларды даярлаудың сапасын арттыру үшін академиялық ортадағы инновациялар саласында талқылау жүргізу және тәжірибемен алмасу болып табылады. Осы сессия барысында педагогикалық кадрларды даярлау мәселелері, оның ішінде кәсіптік-педагогикалық даярлықтың ерекшелігі және рөлі, педагогикалық шеберлікті арттырудың жолдары және білім алушылармен жұмыс жасаудың жаңа нысандары мен әдістерін іздеу бойынша мәселелер қарастырылды.
Сессия жұмысы барысында білім беру мазмұнын жаңарту аясында педагогикалық кадрлардың кәсіби біліктілігін арттыру, педагогика менеджментін жетілдіру, тіл мен пәннің кіріктіріліп оқыту әдістемесінің ерекшеліктері және басқа да мәселелер баса назарда болды.
Сонымен қатар, «Жаңартылған білім мазмұны жағдайындағы арнайы және инклюзивті білім беру үрдісі және келешегі» панельді сессиясы да өз дәрежесінде өтті. Алқалы жиынға қатысушылар мүмкіндігі шектеулі балаларға білім берудің өзекті проблемаларын талқылап, тәжірибе алмасты.
Мүмкіндігі шектеулі балалардың білім алуға құқығы Қазақстан Республикасының Конституциясында, көптеген заңдарда бекітілген. Елімізде мүмкіндігі шектеулі балаларға арналған 100 арнайы мектеп, 38 арнайы балабақша, 55 психологиялық-медициналық-педагогикалық консультация кабинеті, 142 психологиялық-педагогикалық түзеу кабинеті, 13 оңалту орталығы, 734 логопедиялық пункт қызмет етеді.
Келелі кеңестің аясында бұдан бөлек бірнеше басқосулар, шеберлік сабақтары өтіп, Қазақстанның түкпір-түкпірінен жиналған ұстаздар ұжымы бір-бірімен тәжірибе алмасып, тығыз байланыс орнатуға мүмкіндік алды.
Сонымен қатар, «Тәуелсіздік сарайының» төріне қойылған көрме де келген қонақтарды қызықтырмай қоймады. Кеңеске келген меймандар аталмыш көрме арқылы елорданың білім берудегі жаңашыл әдістемелерімен, дарынды балалардың жетістіктерімен, білім беру мекемелерінің үздік инновациялық жобаларымен таныса алды.
Тәуелсіздік жылдарында еліміз 1356 жаңа мектеп, 450-шақты балабақша салған. Жекеменшік секторы 200-ге жуық балабақша ашқан. Бүгінгі таңда 7 мыңнан астам мектеп, 9 мыңнан астам балабақша, 807 колледж бен 125 ЖОО жұмыс жасап отыр. Оқушылар саны 2,7 млн адамнан асса, оларға білім беретін педагогтар саны 350 мыңнан асқан. Қазақстандық оқушылардың халықаралық деңгейдегі интеллектуалдық жарыстарда жеңіп алған жүлделер саны жыл сайын артып келеді. 5700-ден астам бала түрлі деңгейдегі олимпиадалар мен жарыстардан абыроймен оралған. Осының өзі мұғалімдердің маңдайтерімен келетінін естен шығармағанымыз абзал.
Дүниедегі мамандық атаулының төресі – ұстаздық. Себебі, мұғалім барлық мамандық иесін тәрбиелейтін, оқытып үйрететін жандар. Ұстаз берген тәрбие әрбір жанның өміріне жол сілтер шамшырақ секілді. Сондықтан ұлағатты ұстаздарға бүкіл адам баласы құрметпен бас иеді.
«Білімді ел – Мәңгі ел!» деп аталған Тамыз кеңесі де осымен тәмам. ҚР Премьер-Министрінің орынбасары Д.Назарбаева сөзін құттықтаумен бастап, құрметтеумен аяқтады. Ол кеңеске келген ұстаздардың ішінен білім беру саласына ерен еңбек сіңіріп, елеулі үлес қосқан мұғалімдерге алғыс хат табыстады.
Рауан ҚАЙДАР,
«Егемен Қазақстан»
Суреттерді түсіргендер
Ерлан ОМАРОВ,
Мансұр ХАМИТ
