Зілтемірші Зайчиков

жерлестерінің зор құрметіне бөленді Толағай туған жеріне келді. Сын сәтінде өзіне жүктелген жау­ап­­кершілікті тізесі дірілдемей кө­теріп, Рио Олимпиадасының қола жүлдесін қанжығасына байлап келген Александр Зайчиковті Сыр бойының халқы ыстық ықыласпен қарсы алды. Ұшақтан түсіп, жұр­тының құшағына күмп берген батыр ұлдың қуанышы көзінен көрініп тұрды. Қызылордалық жастар мен қарапайым тұрғындар Александрдың құрметіне әуежайға жиналып, ыстық ықыластарына бөледі. Мұнан соң Рио Олимпиадасының жүлдегерін облыс әкімі Қырымбек Көшербаев құттықтап, жылы лебізін жеткізді. – Олимпиадада сен тек зілтемірді көтеріп қана қойған жоқсың, бүкіл қазақстандықтардың рухын ас­қақтаттың. Александрдың келесі медалі алтын болатынына сенемін. Біз Александрдың алдағы жарыстарға, әсіресе, Токиода өтетін Олимпиадаға дайындығы үшін барлық жағдайды жасауға дайынбыз. Сонымен қатар, батыр ұлды тәрбиелеп өсірген анасына зор алғыс айтамыз,– деді Қырым­бек Елеуұлы. Аймақ басшысы Қырымбек Көшер­баев алдағы уақытта зілтемір­шілерді дайындау үшін Қызылордада халықаралық талаптарға сай ауыр атлетика орталығы салынаты­нын жеткізді. «Мен барлық қазақ­стандықтарға, әсіресе, жерлестеріме үлкен алғысымды айтамын. Рио­да жүріп, олардың қолдауын сезін­дім. Қызылордалықтар таңғы 4-те жиналып, менің өнерімді тамашалағандарын білемін. Сіздер­дің қолдауларыңыз маған күш берді»,  дейді Александрдың өзі. Александрдың анасы мен бап­кері де барша қолдау көрсеткен қазақстандықтарға, жерлестеріне алғыстарын айтты. Мұнан соң аймақ басшысы Алек­­сандрға «Toyota Land Cruiser» ав­токөлігінің кілтін, бапкеріне 5 миллио­н теңгенің сертификатын тапсырды. Батыр ұлға көрсетілген қошемет мұнымен біткен жоқ. Олимпиада жүлдегерін құттықтап, ниеттерін білдіру үшін халық орталық алаңға жиналды. Толағай бастаған топ сонда барды. Зор жетістікке жеткен ұланды халық алақанына салып қарсы алды. Облыс әкімінің орынбасары Руслан Рүстемов бастаған азаматтар спортшыны тағы да жеңі­сімен құттықтап, қола жүлденің Токио Олимпиадасында алтынға айналатынына сенім білдірді. Ержан БАЙТІЛЕС, «Егемен Қазақстан» ҚЫЗЫЛОРДА