Өздері кінәлі екен

Осыдан бір ай бұрын Ер­тіс­тің сол жағалауындағы №1 жылу орталығына қарасты екі қазандықтың істен шығуына байланысты осы аумақтағы бірнеше шағын ауданда апатты жағ­дай орын алғаны белгілі. Тіпті, сол шақта Әуезов даң­ғы­лындағы тұтас бір үй апталап жылусыз қалған. Қаланың жаңа басшылығының жедел қолға алған шараларының нәтиже­сінде кемшіліктер түзетіліп, бұл аумақтағы жағдай біршама жөн­деліп қалды. Жу­ыр­да осындай қарбаластан соң бұқаралық ақпарат құрал­да­ры өкілдерімен кездесуге уақыт таба білген қала әкімі Айбек Кәрімов бұл мәселеге бай­ла­нысты қаржы бөлініп жатқан­дығын, соны орнымен игеру мақсатымен жаз шыға бірден іске кірісіп кететіндіктерін ресми түрде мәлімдеді. Ал енді сол шақта елді соншама дүрліктірген тағы бір мә­селеге келетін болсақ, оның мә­нісі төмендегідей болып шықты. Яғни, жығылғанға – жұдырық дегендей, әлгіндей апатты жағ­дай туындаған сәтте қаланың екінші бір шетіндегі Затон деп ата­ла­тын аумағында бірнеше үйді су басып қалғаны да рас. Сонда телеарналардың бірі жерден жеті қоян тапқандай ол оқиғаны да бүкіл ел көлеміне әйгілеп үлгерген. Бірақ тексере келгенде оған билік те, басқа да емес, сол жердегі тұрғындардың өзі кінәлі болып шықты. Яғни, әлгі үйлер бастау көздерінің үстіне заңсыз салынған. Тәртіп сақта­маған тұрғындар мұнымен де шектелмей, бастау көздерін қоқыспен бітеп тастаған. Ал бас­тау көздері жол тауып ашы­лып кеткенде бұл аумақта да қарбалас шақ туындаған. Осы орайда осындай  жағдай өткен жылы да орын алғандығын айта кеткен жөн болар. Абырой болғанда, жергілікті билік өздері кінәлі демей, су басып қалған үйлердің тұрғын­дарына да көмек көрсетуде. Сол мақсатпен арнайы бригада құ­рылып іске кірісіп те кетті. Сонымен бірге, Затон полиция бөліміне үй салуда заңдылықты сақтамаған, тәртіп бұзып, бастау көздерін қоқыспен бекітіп тастаған тұрғандарды анықтау туралы тапсырма берілді. Өзгеге талап қоюмен бірге, өзің де тәртіпті бұзбағанға не жетсін! Дәулет СЕЙСЕНҰЛЫ. Семей.