Жерді жұмаққа айналдырсақ жарасар

Жоғары мәртебелі Пре­зидент Нұрсұлтан Назар­баевтың сөйлеген сөзімен таныстардың барлығы оның болашаққа болжам жасай алатын ерекше қасиетке ие жан екенін сезінетіні анық. Бұл жайт, әсіресе, Қазақ­стан басшысының ядролық қауіпсіздік жөнін­дегі кең ауқымды бастамаларына байланысты айқын көрінеді. Қазіргі әлем тыныш­сыз күйде. Түрлі соғыстар мен жанжалдардан зардап шек­кен мыңдаған бос­қын өз елдерін тас­тап қашып, бас сауға­лауға мәжбүр. Ал Президент Нұрсұл­тан Назарбаев әлем елдерін Жер пла­не­тасын­да­ғы қауіп-қатер­лерді ауыздықтау­ға жет­­кі­лікті деңгейде күш-жігер жұмсауға шақырып отыр. Мәселен, Жоғары мәр­те­белі Президент жаппай қарулануға ұмтылу үдеріс­терін дүниені тас-талқан ететін соғыстың вирусымен салыстырды. Осы орайда, Нұрсұлтан Назарбаев мына­дай сауал тастайды: әлемді осы вирустан қалай аман алып қалуға болады? Бұл жерде кезінде Альберт Эйнш­тейн мен Бертран Рассел қойған сауалдар туын­дайды: «Біз адам баласын жою қажеттігі мәселесі алдын­да тұрмыз ба? Жаңа ұрпаққа соғыс­тан алыстау қажет пе? Немесе адам­зат соғыстардан өз еркімен бас тарту­ға қабілетті ме?» Прези­дент осы сұрақ­тар­дың астарына үңіле келіп, адам баласын жаңа соғыс қатерлерінен құтқару үшін қажетті жаңа бастамалар бола алатын шешімдерді көлденең тартады. Қазақстан Президенті өлім себетін қару-жарақ түрлерін ғарыш кеңістігіне, халықаралық сулардың теңіз түбіне, сондай-ақ, Арктикаға орналастыруға тыйым салатын жаһандық шешім қабылдаудың маңызды екенін атап көрсетеді. Сонымен қатар, халықаралық конвенцияларға қол қою арқылы ғылыми жаңалықтар аясында жаппай қырып-жоятын қарулардың жаңа түрлерін жасауға тыйым салатын сәйкес шешімдер қабылдау керек екеніне баршаның назарын аудартады. Мен, араб елінің азаматшасы ретін­де, Нұрсұлтан Назарбаевты Таяу Шығыстағы және Азиядағы бейбітшілік үшін күрескер және аталған аймақ­тың белсенді одақ­тасы деп санай­мын. Өйткені, Азиядағы өзара іс-қимыл және сенім шаралары жөніндегі кеңес шақыру, Таяу Шығыста жаппай қы­рып-жоятын қару түрлерінен азат аймақ құру, террорлық топтардың таралуы мен ке­ңеюі­не тосқауыл қою бастамалары нақ Қа­зақ­стан Президенті тарапынан көтеріліп отыр. Бүгінгі дүниеде ядролық қару мен жаппай қарулану әкелетін нағыз қасіретті нақ­па-нақ көз алдына елестететіндер аз десем, қателеспейтін шығармын. Қазақ­стан Президенті осы орайда әлемді бейбіт­шілікке, бауырластыққа, ғылыми және зияткерлік үнқатысу негізіндегі адами сүйіспеншілікке шақырады. Сөйтіп, біздің Жер планетамызды, Алла тағала Мұхаммед пайғамбарға бұйырғанындай, жұмақ етуді армандайды. Муна МАХАМРЕ, «Парламентарийлер – ядролық таратпау және қарусыздану жолында» жаһандық желісінің үйлестірушісі