Желбіре, Жеңіс жалауы!

Рио-де-Жанейро қаласында тамыздың 5-інен 21-іне дейінгі аралықта көрік қыздырған XXXI жазғы Олимпиялық ойындар да тарлан тарихтың төріне озып, өткеннің еншісінде қалып барады. Бұл Олимпиада еліміз Тәуелсіздік алған жылдардан бас­­тап діңгегі тік көтерілген қазақ спорты туының сол қал­пын­да көкте самғап тұрғанын көр­сетіп берді. Біздің саңлақтарымыз тап осы Ойындар алдында бір­­қатар таңдаулы, алтын жүл­денің бірден-бір үміткері санал­ған үздіктері сырттан кел­ген соққының сал­да­ры­нан қатардан шығып қал­ған­дары­на қарамастан, бұл аламан­да өздерінің елдің намысы, Отан­ның ар-ожданы жолында барын сарп ете алатын нағыз қа­һар­мандар екендерін танытып шықты. Соның арқасында Қазақ­стан қоржынына 3 алтын, 5 күміс және 9 қола медаль түсті. Осылайша 17 медальды ен­ші­леген команда мұның алдын­да Бей­жіңде өмірге келіп, Лондонда қайталанған рекорд­тық дең­гей­ден 4 медаль асып түсті. Мұнда тек алтын медаль жөнінен ғана мұның алдындағы Лондон Олим­пиадасынан межемізді түсі­ріп алсақ, күміс және қола ме­дальдар жөнінен бұрын-соң­ды болмаған көрсеткішке қол жеткіздік. Осы бәсірелі бәсеке ал­дында ең қатты соққыға ұшы­раған ауыр атлеттеріміз шын мә­нінде де ерлікке тән әре­кет жасап, әлемнің кіл мықты зіл­те­міршілері күш жарыстырған шай­қаста командалық бесінші орынға ие болды. Қазақстан спорт­шылары сапынан бірінші алтын медальды әкелген де осы зілтемір тарландары болды. Бұл қалған саңлақтарымызға үлкен серпін берді. Осы Ойындарда республика спортшылары бірінші рет су спорты түрлерінен жай медаль алып қана қойған жоқ, оның чем­пиондық тұғырды сыйлайтын ал­тын жүлдесіне қол жеткізді. Мұ­ның соңын былғары қолғап ше­берлері іліп әкетті. Олар ортақ қазынаға 1 алтын, 2 күміс және 2 қола медаль әкеліп, бұған дейін Олимпиадалардағы жалпы медальдар санынан артық көрсет­кіш көрсетті. Балуан қыздары­мыздың ерліктері өз алдына бір төбе! Жеңіл атлетикадағы табыс­ты жол тағы жалғасын тапты. Осының бәрі спортшы­ла­ры­мыздың Рио төрінде еліміздің жалауын асқақ желбіретіп қайт­қанын көрсетеді. Ал бүгін Астанада олим­пиа­дашыларға құрмет көрсету шарасы өткелі тұр.