Тұтынушы үшін тиімді

Қазақстан азаматтарының мо­бильдік базасында 2 миллион пайдаланушы тіркелген. Ақпарат және коммуникациялар министрлігінің қызметтерді автоматтандыру басқармасының басшысы Әсет Уаисовтің түсіндіруі бойынша, осы базаға қатысу Мобильді үкі­меттің ұсынатын барлық қолайлығы мен функцияларын пайдалану мүм­кіндігін береді. Бұл Мобильді үкімет, атап айтқанда, eGov-тың мобильді қосымшасы болып табылады. Еgov.kz электронды үкімет порталы немесе «Азаматтарға арнал­ған үкімет» мемлекеттік корпо­ра­ция­сының бөлімдері арқылы әрбір қалау­шы Мобильді үкіметтің пайдаланушысы бола алады және мобильдік базаға тіркеле алады. Ол үшін порталда авторландырудан өту, өзінің телефон нөмірін, құпия сөзін көрсету және электронды цифрлы қолтаңба (ЭЦҚ) көмегімен тіркеуді растау жеткілікті. Бүгінгі күні кез келген уақытта смартфон немесе планшет арқылы қосымша пайдаланушыларына 80 түрлі қызмет пен сервис қол­жетімді. Оның ішінде, мысалы, мекен-жай анықтамасын алу, балабақшаға баланы кезекке қою, салықтарды, айыппұлдарды төлеу және т.б. бар. Ал мобильді жеке кабинетке келетін болсақ, ол жерге азамат туралы барлық негізгі ақпарат түрлі мемлекеттік органдардың деректер қорларынан автоматты түрде тартылып жинақталады. Мысалы, пайдаланушы өз жеке кабинетінде жеке куәлік немесе техбайқаудың қолдану мерзімінің аяқталуы жайлы және де ЖҚЕ бұзғаны үшін айыппұлдар мен борышкерлердің тізіліміне енгізілуі туралы хабарландыруларды алады. Сонымен қатар бұл ақпарат SMS-хабарламалары мен push арналары арқылы да келеді. «Мысалы, сіз жол қозғалысы ережесін бұзғаныңыз үшін айыппұл туралы смартфонға хабарламаны ал­ғанда оны бірден eGov қосымшасы ар­қы­лы төлей аласыз. Бұл шын мә­нін­де өте ыңғайлы», дейді Уаисов мырза. Қазіргі таңда, Қазақстанда Мо­бильді үкімет арқылы 4,5 миллионға жуық қызмет көрсетілген болса, eGov қосымшасы 365 мыңнан астам рет жүктелді.