Берекелі істің басында

Өңірімізге белгілі кәсіпкер әрі меценат Бақтыбек Мұсабаевты біл­мейтін адам кемде-кем. Ол жетек­шілік ететін «Некрасовка и К» шаруа қожалығы Тарбағатай тауының қойнауына орналасқан Некрасовка ауылында. Шаруашылық бүгінгі күндері аудан көлемінде кеңінен танымал десек, артық айтқандық емес. Мал өсірумен, астық өндірумен айналысатын бұл ұжымда 30 адам еңбек етеді. Б.Тоқашұлының қарамағында 1100 гектар егістік жер, 500 гектар ша­бындық, 1500 гектар жайылым жер бар. Сондай-ақ 400-ге жуық «Әу­лиекөл» және «Симменталь» асыл тұқымды сиырын бағады. 500-ден астам қазақтың асыл тұқым­ды жабы жылқысы да осы қожа­лық­тың қарамағында. Шөбі шүйгін, жері құнарлы, табиғаты келіскен бұл өңірде Бақтыбек Мұсабаев бас­қа­ратын «Некрасовка и К» шаруа қожа­лы­ғы омарта шаруашылығы­мен де ай­налысып келеді. «Карпатка» деп ата­латын  аралар­ды өсіріп, дәруменге аса бай бал таға­мын өндіруде. Жалпы, Бақтыбек Мұсабаев бұдан өзге «Үржар-Қарабұйрат» ба­ғы­тындағы жолды жыл сайын қыс­та қардан аршып, жерлестерінің ал­ғы­сына бөленіп келе жатқан азамат. Ал биік таудың қойнауын ежелден қалың қар басатыны белгілі. Ол бұл істі үлкен жауапкершілікпен, адал да тиянақты атқарып келеді. Барқытбел ауылдық округіне қарайтын Барқытбел, Батпақты, Бла­годатное, Некрасовка, Қарабұй­рат елді мекендерінің тұрғындары қашанда өз жерлестері Бақтыбек Мұсабаевты азамат ретінде, кәсіпкер ретінде мақтан тұтады. Өйткені, ол қай уақытта да қиналған, көмек қолын қажет ететін жандардың қасынан табыла алады. Аз қамтылған отбасылардың, мұқтаж жандардың тауқыметтері мен мәселелерін шешуге үнемі жәрдемдесіп келе жатқан азамат. Ол осы округке қарасты білім ордаларында өтетін әртүрлі акцияға да белсене қатысады.  Бейсенғазы ҰЛЫҚБЕК Шығыс Қазақстан облысы