Қытайдың қымбат қазынасы

Бұл күндері еліміздің екі басты қаласы Астана мен Алматыда Қытай Халық Республикасынан келген, құрамында 200-ден астам адам бар үлкен делегация аса маңызды миссияға ұйытқы болуда. «Қытайман танысу» деп аталатын ауқымды шаралар Ұлы Жібек жолы бойындағы барыс-келістерді жаңғыртуға бағытталған. Бір жағынан Алматы қала­сының 1000 жылдығына арнайы артынып-тартынып келген көршілеріміз Хэнань, Хубэй, Сычуань провинцияларының сәлемі мен дәстүрін, өнері мен мәдениетінің бөлшегін көтере келді десе де болады. Апта басында Алматы­да осынау үлкен оқиға қазақ­стан­дық БАҚ өкілдері­мен кездесуден басталды. Дүйсенбіге дейін жалғасатын «Қытаймен танысу» бағдарламасы аясында туристік көрмелер, фольк­лор­­лық концерттер, кунг-фу шебер­лерінің ойындары сәті­мен салтанат құруда. Соның ішіндегі маңызды оқиғаның бірі – Алматыдағы Ұлт­тық кітапханада ҚХР Мем­­ле­кеттік кеңесінің Баспа­сөз-кең­сесі, ҚХР Чунцин қаласының Халық үкіметі Баспасөз-кең­сесі, Хенан, Хубэй және Сычуань (ҚХР) аймақтарының өкіл­дері біріге отырып жүзеге асыр­ған «Даналық. Өмір – Қытай­да зияткерлік деңгейде жа­сал­ған-2016» көрмесі. Әрі осы­нау шара аясында «Қытай мә­де­ниеті мен әдебиеті залы» ашылды. Ауыз толтырып айтуға тұрар­лық тұсаукесер барысын­да Қытай павильонына көр­шілеріміз 9 мыңға жуық құнды кітаптар мен Қытай мәдениетін әйгілеп тұратын бұйымдар сыйлады. Алматыдағы Қытай Халық Республикасы Бас консул­дығының қолдауымен өткен көрме мұнан былайғы жерде Қытай павильонында тұрақты орын алады. Ен­дігі жерде «Қытай мәдениеті мен әдебиеті залы» қазақстандықтарға көрші ел туралы, оның мәдениетін, тарихын, салт-дәстүрін көбірек білу­ге көмектеседі. Залда тұрмыс­тық заттар, музыкалық аспаптар, әртүрлі бағыттар бойынша әдебиеттер: анықтамалық-энциклопедиялық басылымдар, сөздіктер, қытай тілін үйренуге арналған оқулықтар, Қытай туралы танысу әдебиеттері қойылды. Мұнан да бөлек Ұлттық кітап­ханада «Smart life – Created in China-2016» Қытай Халық Республикасының ғылы­­ми және индустриялық жетіс­­тік­тері­нің кең ауқымды ақпа­рат­тық көрмесі өтуде. «Парасаттылық адамдарды бақытты етеді, адамдарға әлемді жақсы түсінуге көмек­тесе­ді және өмірін жақсы жаққа өзгертеді» атты көрме­нің тақырыбы ЭКСПО-2017 қар­саңында өте өзекті. Бұл көр­ме көр­шілеріміздің энергия үнем­деу, «жасыл» энергетика саласындағы және ғылым мен техника инновацияларының қоршаған ортаға зиянсыздығын көрсетуді мақсат тұтады. Қазақ тарапы ықыласпен қарсы алған шарада ҚКП ОК Насихаттау бөлімі меңгеру­шісінің орынбасары бастаған ҚХР делегаттары, ҚХР Мемле­кет­тік кеңесі Баспасөз-кеңсесі басшысының орынбасары Цуй Юуй Инь, ҚХР Мемлекеттік кеңесі Сыртқы істер басқармасы басшысының орынбасары Жао Шун Гуо, Чунцин қаласының халық үкіметі Баспасөз-кеңсесінің басшысы Жоу Бо мырзалар сөз сөйлеп, бұл бастамалар екі елдің татулығына қызмет етеді деді. Айнаш ЕСАЛИ, «Егемен Қазақстан»  АЛМАТЫ