Жетісудағы кітапханашылар жиыны

Талдықорғанда «Мәдени мұра» мемлекеттік бағдарламасы аясында «ХХІ ғасыр кітапханасы: жас­тар стратегиясы» тақырыбында рес­пуб­ликалық жас кітапханашы­лар форумы өтті. Сөйтіп еліміздегі ең алғашқы кітапхана туризмі Жетісу жерінде басталды. Форумды Алматы облысы әкімінің орынбасары Бақтияр Өнербаев ашып, жүр­гізіп отырды. Заман ағымына орай дамыған өркениетті елдер қатарынан орын алу үшін жасалып жатқан бұл қадамның бір мақсаты кітап әлемі мен интернеттегі әлеу­мет­тік желілердің арасында жақ­сы байланыс қалыптастыру болып табылады. Ортақ мүддеге орай ҚР Ұлттық академиялық кітап­хана­­­сының басшысы, педагогика ғылым­дарының докторы, профессор Үмітхан Мұңалбаева, белгілі философ ғалым Ғарифолла Есім, Мемлекеттік сыйлықтың лауреаты, ақын Несіпбек Айтұлы, жазушы-ғалым Тұрсын Жұртбай және кітап­хана саласының мамандары соқта­лы ой, құнды пікір қосты. Негізі зия­лы қауым өкілдері қасиетті нәрсе қарапайым болатындығын, адам­ға ілім сәулесін түсіру кітаптан баста­ла­тын­дықтан кітапхананы қолдау қо­ғам­ды дамыту екендігін баса айтты. Бүгінде республика бойынша 11300 кітапхана жұмыс істейді. Оған 4 млн 782 оқырман барып, рухани қажеттілігін өтесе, әлеуметтік желі  фейсбукте кітапхана достары саны 1686. Әрине аз. Бірақ күн санап өсіп келе жатқаны қуантады. Сонымен Талдықорғанда бастал­ған кітапхана туризмі облыс­тағы аудандар мен қалаларда жалғасты. Нұрбол ӘЛДІБАЕВ, «Егемен Қазақстан» ТАЛДЫҚОРҒАН