Баршаның «бас ауруы» еді

Тұрғын үйдің жайлылығы әр отбасының зор бақыты. Осы мәселенің Елбасымыз Нұрсұлтан Назарбаевтың биылғы Жол­дау­ын­да нақты көрініс, тіпті арнайы проблема ретінде көрсетілуі кім-кімді де бейжай қалдырған емес. Әсіресе, бір күрек бойынан-ақ жерасты суы жылтылдап көріне бас­тайтын біздің Атырау үшін  аса өзекті мәселе. Себебі, қала­мыз­да тұрғын үй құрылысы соң­ғы жылдары ерекше қарқынды жүргенімен, негізгі тұрғын үй қо­ры бұдан 30-50 жылдай бұрын са­лынған, жертөлелері суға толы, кірме дәліз бен пәтер бөлмелері қысы-жазы масадан арылмайтын ғимараттардан тұрады. Рас, Үкімет тұрғын үй-ком­му­налдық шаруашылыққа көңіл бөл­мей отырған жоқ. Арнайы агент­тік құрылды, тұрғын үй қоры, пәтер иелері кооперативтері (ПИК-тер) ту­ралы ережелер шықты. Осы салаға жылма-жыл қырауар қаржы бөлінсе де, елі­міздің барлық қалаларында ескі тұрғын үй қорының жай­лы­лығы жақсарып кете қоймай тұр. Қайда да коммуналдық шаруа­шы­лыққа бөлінген қаржы көп қабатты үй­лердің жертөлелеріне жетпей қа­ла­ды. Жергілікті коммуналдық қыз­мет басшылары  жекешеленген үй­дің жай-күйіне біз жауапты емеспіз деп, барлық міндетті ПИК-терге аударады. Қолында не қаржысы, не техникасы жоқ ПИК-тердің қандай қауқары бол­мақ? Олардың аула сыпырудан, пәтерақы жинаудан бас­қаға ша­масы жетпейтін мүсәпір халін кө­ріп, тұрғындардың бір бөлігі бірнеше жылдап пәтерақы төле­мей­ді.   Ал ПИК-тердің пәтерақы тө­ле­мей­тіндерге қолданар ешбір шара­сы да,  қаһары да жоқ. Тіпті бо­рыш­ты­ларды сотқа беруге де, бас­пасөзде жариялауға да заңдық құқы жоқ секілді. Тұрғын үйлердің жайсыз­ды­ғына налыған халық амалсыз қала басшылығына арызданады. Алайда, еститінің бір сөз – үйлер жекешеленген, өздерің ПИК құрдыңдар. Жеке меншік үйлердің кондоми­ни­му­­мы үшін тұр­ғындардың өздері, олардың ПИК-тері жауапты делінеді. Сөй­тіп, қала басшыларын да кінәлай алмайсыз. Шынында да жеке адам­ның үй-жайын жақ­сарту үшін мем­лекет неге қаржы бөлуі керек?! Талап, тәртіп, ережелер осы­лай болса, қайтеміз деген халық соңғы оншақты жылдан бері бұл мәсе­ле­нің оң шешімінен күдер үзе бас­та­ғандай еді. Бірақ Тұң­ғыш Президентіміз Нұрсұлтан Назарбаев тұрғын үйдің жай­лылығын кішігірім проблема деп қарамады. Бұл Елбасының ірі мә­селеге ел хал­қы­ның бір бөлігінің  көкейкес­ті проб­лемасы ретінде көңіл бөл­геніне қуаныштымыз. Сөйтіп, «тұр­ғын үй қатынасының оңтайлы моделін құру», сондай-ақ, «жөн­деу мен қал­пына келтіру ісін қо­сыла қар­жы­ландыру тетігін жасау» жөнін­дегі міндеттерді айқын­дап берді. Енді ПИК-тер туралы ережеге де, жалпы тұр­ғын үй қа­ты­насы туралы заңға да толық­тырулар мен өзге­рістер енгізу қажет шығар. Қара­пайым халық Елбасы Жолдауында тұр­ғын үй жайлылығы туралы қиюы қашқан проблема арнайы қоз­ғал­ғаннан кейін, сонымен қатар, бұл салаға бұдан былай қалған-құт­қанды бөлу қағидасымен емес,  қаржы­лан­дыру тетіктері жасала­тын­дықтан, баршаның «бас ау­руы» іспетті түйіндер біртіндеп оң шешімін табарына бек сенеді. Қилыбай ҚУАНЫШБАЕВ, еңбек ардагері. Атырау облысы.