«Егемен Қазақстан» газетінің интернет-сайтында алдағы уақытта орыс және ағылшын тіліндегі нұсқалар іске қосылады. Бұл туралы Орталық коммуникациялар қызметінде өткен брифинг барысында «Егемен Қазақстан» республикалық газеті» АҚ басқарма төрағасы Дархан Қыдырәлі мәлімдеді.
Бүгінгі уақыт жедел ақпарат заманы болғандықтан, газеттің интернет-сайтын дамытуға да айрықша көңіл бөлініп отыр. Негізгі мақсат – сайтты жедел әрі сенімді ақпараттық порталға айналдыру
«Газеттің интернет сайты басылым материалдарына тәуелді болмауы керек. Яғни, сайт газетте жарияланған мақалаларды көшіріп басып қана отырмауы тиіс. Өйткені, газеттің өз оқырманы, интернеттің өз оқырманы бар. Сондықтан біз де сайттың дербес жұмыс істеуіне ерекше көңіл бөле бастадық. Онда жарияланатын ақпараттар легін арттырдық. Сәйкесінше, біздің сайтты оқитын оқырмандар қатары да көбейді. Жалпы, біз «Егеменнің» сайты болашақта ақпарат кеңістігінде өзіндік орны мен салмағы бар, ең сенімді әрі жылдам ақпарат тарататын толыққанды интернет порталға айналуы тиіс деп санаймыз. Бұған қажетті мүмкіндіктер бізде баршылық. Соған байланысты бірқатар жоспарларымыз да бар. Атап айтсақ, сайттың көзі нашар көретіндерге арналған және орыс, ағылшын тілдерінде шығатын нұсқаларын ашу, аудио-газет қосымшаларын енгізу, мультимедиалық мүмкіндіктерін арттыру сынды жұмыстарды қолға алуды жоспарлап отырмыз», – деді басқарма төрағасы.
Айдар ӨРІСБАЕВ
