Қарусыздану қадамдарын қолдады

Сенат Төрағасы Қасым-Жомарт Тоқаев Пагуош ғылым және халықаралық істер жөніндегі ғалымдар қозғалысының президенті, белгілі дипломат, БҰҰ Бас хатшысының Қарусыздану жөніндегі бұрынғы орынбасары Джайантха Дханапаланы қабылдады, деп хабарлады Сенаттың баспасөз қызметі. 1957 жылы құрылған Пагуош қозғалысы бейбіт­шілік, қарусыздану, қауіпсіздік және жа­һандық ауқымдағы ғылыми ынтымақ­тастықты жақтайтын ғалымдарды, саясат­керлерді және қоғам қайраткерлерін бірік­тіре­ді. Қозғалыс Ядролық қаруды атмосферада, ғарыш кеңістігінде және су астында сынауға тыйым салу туралы шарт, Ядролық қару­ды таратпау туралы шарт, Зымырандарға қарсы қорғаныс жүйесін шектеу туралы шарт, Қарудың биологиялық және химиялық түрлеріне тыйым салу туралы конвенция, Еуро­падағы жай қарулар туралы шарт, тағы басқа негізгі көптарапты келісімдерді әзір­леуде және қабылдауда маңызды рөл атқарды. 1995 жылы Ұйым Нобельдің Бейбітшілік сала­с­ындағы сыйлығына ие болды. Қ.Тоқаевтың айтуынша, Қазақстан Па­гуош қозғалысының идеясы мен құнды­лық­тарын жақтайды, сондай-ақ қозғалыстың қарусыздану және қауіпсіздік саласындағы халықаралық келісімдерді әзірлеудегі және қабылдаудағы рөлін жоғары бағалайды. Кездесу барысында Қазақстанның Па­гуош қозғалысының 2017 жылы болатын мерейтойлық кездесуін өткізу мүмкіндігі қаралды. Қозғалыс мүшелерінің Астанада сондай кездесу өткізу туралы тілек білдіруі Семей ядролық полигонын мәңгілікке жауып, адамзатты ядролық соғыс қаупінен құтқару ісіне нақты үлес қосқан, әлемде қуаты жағы­нан төртінші орын алатын ядролық әлеуеттен бас тартқан біздің еліміздің және оның басшы­сы Президент Нұрсұлтан Назарбаевтың халықаралық беделіне байланысты болып отыр. Қ.Тоқаев 29 тамызда болған «Ядролық қа­русыз әлем құру» халықаралық конферен­ция­сына қатысқаны және ондағы мазмұнды баяндамасына орай мейманға ризашылық білдірді.