Тағдыршешті қадам

Биыл 25 жылдығы аталғалы отырған Тәуелсіздікке қол жеткізбей тұрып, Семей ядролық сынақ полигонын жабу секілді батыл шешім қабылдау екі басшының бірінің қолынан келе бермесе керек. Жақында елордамызда адамзат үшін аждаһа апанына айналған атом аранының жабылуына орай халықаралық жиын өтті. Бұл басқосудың Қазақстанның күллі әлемге қозғау салып, бастама етіп көтерген «Ядролық қарусыз әлем құру» жобасы шеңберінде өткізілгенінен хабардармыз. Жалпы, Семей сынақ алаңын жабу – Елбасының халықтың рия­сыз ықыласын еншілеген тағ­дыр­шешті шешімі болды. Мем­л­екет басшысы Нұрсұлтан Назарбаев Астанадағы конференцияда айтқандай, 40 жылда 500-ге жуық ядролық жарылысты бастан өткеріппіз. Бұл – адамзаттық қыл­мыс дер едім. Міне, осы сынақ­тардың радиациялық зауалы мен салдарын өңіріміздің тұрғындары әлі тартып келеді. Семей өңірінен бөлек, Өскеменде де аталған атом жарылыстарының сәулесін алған адамдар көп тұрады. Күн сайын сан науқаспен сөйлесеміз. Басым бөлігінің денсаулығына сыртқы қоршаған ортаның әсері байқалады. Оның ішінде Семей сынақ полигонының зардабын айналып өте алмаймыз. Өйткені, аурудың ошағын іздеу барысында, емделушімен әңгімелесе келе, оның радиа­ция радиусына енетін аумақта туып-өскенін, еңбек еткенін анықтау қиын емес. Осы орайда мемлекетіміз халықтың денсаулығын алдыңғы орынға қоятынын айтқым келеді. Айталық, қазір «Саламатты Қазақ­стан» бағдарламасы аясында тұрғын­дарды скринингтік тексеруден өткіземіз. Бұл ауру­дың көзін бастапқы кезеңінде анықтауға мүм­кіндік береді. Адамдардың 10-15 пайызы өзінің денсаулығында кінәрат бар екенін біле бермейді. Скринингтік тексеру барысында осы кінәратты анықтаймыз. Халық соңғы уақытта скринингке үйреніп келеді. Медициналық мекемелер мен кәсіпорындар скринингтік тек­­серу­ден өткізуге уақыт бөлу жө­нін­­­де арнайы меморандум қа­был­­­дай­ды. Сондықтан, скринингтік тек­­­серу­­ден өтуге мекемелер мен ұйым­­­дар тікелей жағдай жасауы ке­рек. Соңғы жылдары өңірімізде радио­­­­ло­гиялық орталық пен оңал­ту ор­­та­лықтары құрылып жатыр. Бұл да осы зұлмат жарылыстардың сал­дарын жою­ға бағыт­талған мемлекеттің қамқорлығы деп білеміз. Жалпы, Қазақстанның ядролық арсенал­дан ерікті түрде бас тартуы батыл бет­бұрыс­тарға бастағаны анық. Бүгінде бейбітшіліктің жақ­таушысына, ядролық қарусыздануға үндейтін мемлекетке айналдық. Нұрсұлтан Әбішұлы айтқандай, әлем елдері Қазақ­стан­­ның ұсынысы негізінде Семей сынақ алаңы­ның жабылған күніне орай 29 тамызды Ядро­лық сынақтарға қарсы халықаралық іс-қимыл күні ретінде атап өте бастады. Елбасының «Әлем. ХХІ ғасыр» атты мани­фесінде де бұл бағыттағы қадамдар нақты сара­лан­ды. Бүгінде манифест әлемдік бейбіт­ші­лік­тің бағдары болған құжатқа айналып отыр.  Светлана ЖАУҒАШАРОВА, Өскемен қаласы, Солжағалаулық емхана терапия бөлімінің меңгерушісі, гастроэнтеролог ӨСКЕМЕН