Жеті шақырымға жеті минутта жетеді

Биылғы жаз Алматы облысы, Кербұлақ ауданы Қарымсақ ауылы тұрғындары үшін ерекше бол­ды. Облыстық және аудандық әкім­діктердің қолдауымен ауыл мен Алматы – Жаркент тас жолын бай­ланыс­тыратын 7 шақырым кір­ме­жолға тұңғыш рет асфальт төселді. 200-ге жуық үйі бар Қарымсақ ауылы шөбі шүйгін, қандай қуаң­шылық болмасын астығы бітік шы­ғатын, малға жайлы, тоғайы қалың, суы мол ауыл. Ауылдың ең үлкен мәселесі шаңы шыққан, ойқыш-ойқыш, әбден тозығы жеткен жол еді. Бұл ауылдың, тіпті КСРО заманында да тас жолы болмаған. Жергілікті  халық жолдың азабын әбден тартқан. Ауыл терең сайда орналасқаннан кейін елді мекенге кіреберіс тұста 1,5 шақы­рым­ға созылған тік жота бар. Сол жота қыс мезгілінде шығуға қиын кәдімгі мұз айдынына айнала­д­ы. Ал қалың қар жауса қатынас қиындап кететін. Көктем айларында таулардан аққан су жолды жырып, көліктер батпаққа батып, ауылдан шығу мүмкін емес кездер әр маусымның көрінісі. «Нұрлы Жол» бағдарламасы ая­сында Алматы облысы мен Кер­бұлақ ауданы әкімдіктерінің тікелей қолдауының нәтижесінде бюджеттен 200 миллион теңге бөлініп, ені 5 метр, ұзындығы 7,5 шақырым жерге жоғары сапалы асфальт төселіп, пайдалануға берілді. Бұрын 7 ша­қырымды жүріп өту үшін 40 минут кетсе, қазір 7 минут жеткілікті. Бұдан бөлек биыл ауылға авто­маттандырылған су мұнарасы салынып, көшелерге су құбырлары тартылып, әр үйге су кіргізілмек. Сондай-ақ, аудандық қазынадан Қарымсақ орта мектебінің күр­делі жөндеуіне 7,5 млн теңге бөлінді. Мектеп директоры Ғалия Балғымбаеваның айтуынша, жөндеу жұмыстары қызу жүріп жатыр. Билік тарапынан жасалған осын­­дай игілікті шараларға ауыл тұр­ғын­­дары қарап қалмай, өздерінің қара­жатына орталық көшенің қақ орта­сынан  күмбезді мешіт салып жатыр. Ауыл ақсақалдары мұнымен қоймай орталық көшеге дала шамдарын да тұрғызбақ жоспарлары бар. Көп ісінде – береке. Ауыл ақсақалы Ысқақ Кибиров: – Бұл тас жолды біз ұзақ күттік. Облыс, аудан әкімдеріне алғы­сы­мыз шексіз. Енді ауылдан еш­кім көшпейді, қайта жанданып, тұр­ғын­дар саны көбейеді. Биыл өзі бере­ке­лі жыл болды, шөбіміз қалың, асты­ғы­мыз мол, нағыз сабантой жылы. Жолдың сызбасына атсалыс­қан жобалаушы инженер Қанат Миникаев: – Жолдың сызба жобасы, сме­та­лық құжаты осыдан 3 жыл бұрын жасалған болатын. Бұл жоспар 2016 жылы ғана жүзеге асты. Жүктелген шаруа уақтылы орындалды. Ең бастысы, еңбегіміз ауыл тұрғын­дары көңілінен шығып отыр. Тақ­тайдай тегіс жаңа жол тұр­ғын­дарды серпілткендей. Үйлері сиреп, күңгірт тартқан ауыл көрінісі бүгінде жоқ. Көшелер бойы әдемі қақпалар қойылып, терезелер сырланып, гүлдер құлпырып тұр. Бүгінде мемлекет тарапынан жасалған қол­даулар өңірлерге жаңа дем беріп отыр. Ауыл тұрғындарының ел басшылығына айтар алғысы шексіз. Әлия АЛПЫСБАЙҚЫЗЫ Алматы облысы, Кербұлақ ауданы