Ескі үйлер де ескеріледі

Осыдан 70-80 жыл бұрын салынған ескі үйлерден Семей де кенде емес. Әуезов даңғылын­да­ғы әбден тозығы жеткен сондай үйдің бірі қысқы қатты аязда адам тұрғысыз жағдайға жетіп, қатып қалды. Сол апатты жағдай мұнда екі-үш аптаға созылды. Жұмысқа жаңа кіріскен қала әкімі Айбек Кәрімов сол шақта күндіз-түні осы арадан табылды десе де болады. Ақыр соңында әлгі ескі үйге жылу беріліп, онда­ғы тұрғындар бір жасап қалды. Бірақ мұнымен бар шаруа шешілді деуге болмайды. Өйткені, ескінің аты ескі. Мұндай үйлерде ертең тағы да апатты жағдайдың орын алмасына ешкім кепілдік бере алмайды. Жуырда осы 41-ші үйдің тұрғындарымен кезіккен облыс басшысы Бердібек Сапарбаев мұндай жағдайдан шығудың бір ғана жолы бар екендігін айт­ты. Яғни, республика Үкіметінің енді қабылданғалы жатқан бағ­дар­ламасында көп қабатты ескі үйлерді жөндеуден өткізу мақса­ты­мен игі шара қарастырылып отырған көрінеді. Әзірше осы бағдарлама бой­ын­ша еліміздің екі қаласында тә­жірибе жұмысы жүргізілетін болса, соның бірі Семей екен. Екі қа­ла­да көп қабатты он үй арнайы сараптамадан өткізілмек. Сонсоң әлгі сараптама негізінде мемлекет тарапынан тиісінше қаражат бөлінбек. Барлық қаражаттың 70 пайызын мемлекет өзі көтеріп алмақ. Қалған шығын тұрғындар­дың есебінен жабылмақ. Өкінішке қарай, осы кездесуде қайсыбір тұрғындар бұл үйде негізінен зейнеткерлер тұратын­ды­ғын айтып, өздері үшін әлгі қалған қаражатты табудың өзі күш­ке түсетіндігін мәлімдеп жат­ты. Бұл енді артық талап па дейміз. Өйткені, дамыған елдердің өзінде ешкім де барлық міндетті мемлекеттің мойнына іліп отыр­ған жоқ қой. Облыс басшысы айтқандай, онда басқа амалын қарастыру керек. Мүмкін осын­дай үйлердің астыңғы қабат­тары­на орналасқан түрлі мазмұндағы сауда нүктелерінің иелері көмек­ке келер. Тұрғындардың басым бөлігі қалай болғанда да Үкі­меттің бұл оңды қадамын құп­тайтындығын білдіріп жатты. Шындығында үй мәселесіндегі тығырықтан шығудың бір жолы осы болар. Дәулет СЕЙСЕНҰЛЫ. Семей.