Шаршы тақтадағы шайқастар

Бакуде шахматтан Дүниежүзілік олимпиада басталды Қазіргі күндері шахматтан Әзербайжанның астанасы – Баку қаласында 42-ші Дүниежүзілік олимпиада өтіп жатыр.  Оған әлемнің 176 елінен 2 245 шахматшы қатысуда.  Бұл сынға біз­дің елімізден 5 ер адамнан және 5 қыздан жасақталған команда аттанған-тын. Оларды жаттық­ты­ру­шылар Павел Коцур мен Серік­бай Темірғалиев бастап барды. Қазір Олимпиаданың 3 ту­ры­ның ойындары өтті. Қазақ­станның ерлер және қыздар құрамасы осы матч­тардың бәрін жеңіспен аяқтады. Ерлер командасы бірін­ші Мавритания құрамасын 4:0 есебімен ұтты. Қыздар командасы Гондураспен кездесіп, 3:1 есебімен жеңіске жетті. Одан кейін Жансая Әб­дімәлік бастаған қыздарымыз Болгария шахматшыларынан басым түсті. Ерлер құрамы 2-турда Жаңа Зе­лан­дияны жеңіп, 3-турда Хор­ватиямен 2:2 есебімен тең түсті. Енді Қазақстанның ерлер командасы Эстониямен, ал қыздар Литвамен кездеседі. Қазір үш тур­дың нәтижесі бойынша елі­міз 176  мемлекеттің арасында 13-орында келеді. Ал Жансая Әбді­мәлік жеке есепте Италия және Бразилия шахматшыларымен бірге 1-орынға шықты. Жалпы, биылғы Олимпиадада ерлер және қыздар командасының жүлделі орынды жеңіп алуға толық мүмкіндігі бар. Осы мақ­сатта құрама командаға соң­ғы кездері жақсы нәтиже көр­сетіп жүрген шахматшылар алын­ған. Команда сапында қазір мына шахматшылар шаршы тақ­та додасына қатысып жатыр. Қыздар құрамында халық­аралық гроссмейстерлер мен шеберлер Жансая Әбдімәлік, Елена Анкудинова, Гүлмира Дәулетова, ФИДЕ шеберлері Шолпан Жылқайдарова және Айсезім Мұхит, ерлер командасында халықаралық гроссмейс­терлер Ринат Жұмабаев, Мұртас Қа­жығалиев, Әнуар Есма­ғам­бетов және Петр Костенко бар.  Сонымен бірге, командаға балалар арасындағы Қазақстан чемпионы Азамат Өтеуғалиев те қосылды. Дастан КЕНЖАЛИН, «Егемен Қазақстан»