Көпір орнап, көңіл орнына түсті

Бұл күндері жұрт бұрынғыдай әкімдікке өз жеке басының қа­мын күйттейтін шаруаларын азайтып, ел игілігіне жарайтын мәселелермен келетін болған. «Ел­де болса ерінге тиеді» дегендей, бірдің емес, мыңның шаруа­сы қашанда жоғары. Қазы­ғұрт ауданы Тұрбат ауыл­дық округі ақсақалдарының Тұрбат ауылы мен Қызылдиқан елді мекендері аралығын қосатын көпір салу жөніндегі бастамасы Тәуелсіздігіміздің 25 жылдығы аясында жүзеге асырылды. Екі ауыл арасынан Тастақсай тау өзені өтеді. Жаздың күндері момақан болғанымен ерте көктемде жауын-шашын және еріген қар суынан ағыл-тегіл болып, долы күйге тү­сетін өзен өткел бермей, екі ауыл тұрғындарын әбігерге салатын. Ел аға­лары, кәсіпкерлер қаржы жинап, өткел жасағанымен, кей жылдары ашуына мінген долы өзен жаңқадай ағызып кетер еді. Енді екі ауыл тұрғындары тау өзенінің гүрілін тыңдап, алаңсыз ұйықтайтын болды. Жақында Тұрбат ауылы мен Қызылдиқан елді мекенінің арасындағы көпір пайдалануға берілді. Ұзындығы 66, ені 8 метр болатын көпірді салуға қар­жы облыстық бюджеттен бө­лінді. Екі ауылды қосқанда үш мы­ңнан астам халық тұрады. Осы уақытқа дейін екі ауылдың қолдан жасалған өткел арқылы амалдап келгенін айттық. Оқыс оқиға болмаса да Алла тағала «сақтансаң – сақтаймын» дегендей, түбі бір опық жегізері хақ еді. Енді Тәуелсіздігіміздің 25 жыл­дығы қарсаңында пайдалануға берілген көпір жүрекке ұялаған үрейді жеңді, ел тынышталды. Бұ­рынғы «Шайтан көпірден» Алла сақтасынын айтып, амалдап өте­тін ағайын алғысын ең алдымен Елбасына, тұрғындардың өтіні­шін орындаған облыс, аудан әкім­ді­гіне айтып жатыр. Бақтияр ТАЙЖАН, «Егемен Қазақстан» Оңтүстік Қазақстан облысы