«Тіл әлемі» порталы іске қосылды

Мәдениет және спорт министрлігі Тілдерді дамыту және қоғамдық-саяси жұмыс комитетінің тапсырысымен «Тіл әлемі» атты жаңа портал және ономастика саласына арналған – «аtau.kz», орфографияға арналған – «еmle.kz», сондай-ақ терминология бойынша «termincom.kz» сайттары іске қосылды. Астанадағы Ұлттық академиялық кітапханада өткен аталған веб-ре­сурстардың түсаукесер рәсіміне Пар­­ламент депутаттары мен қоғам қай­раткерлері, тіл мамандары, журналистер қатысты. Жаңа порталдардың көмегіне Қазақстан тұрғындарынан бөлек, Қытайда, Моңғолияда, Өзбекстанда, Түрікменстанда, Түркияда және Еуропа елдерінде тұратын диаспора өкілдері де жүгіне алады. Тілдерді дамыту және қоғамдық-саяси жұмыс комитетінің төрағасы Қуаныш Асыловтың айтуынша, тілді насихаттау ешқашан маңызын жоймайтын тақырып.  «Бұл жоба аясында сіздер мемлекеттік тіл, сондай-ақ елімізде тұратын этнос тілдері туралы жаңалықтармен, тіл үйренуге арналған еңбектермен, еліміздегі тілдік ахуалмен, тілге қатысты ой-пікірлермен, аудио және бейне материалдармен, жалпы алғанда, еліміздегі тілдердің тыныс-тіршілігімен барынша толығырақ таныса аласыздар» дейді ол. Ш.Шаяхметов атындағы тілдерді дамытудың республикалық-үйлес­тіру әдістемелік орталығының директоры Ербол Тілешовтің айтуынша, порталды ашудағы негізгі мақсат 2011-2020 жылдардағы Тіл­дерді дамыту стратегиясын жүзеге асыру болып табылады. Алқалы жиынға қатысқан тіл жанашырлары бұл бастаманың мемлекеттік тілдің қолдану аясын кеңейте түсудегі маңызына тоқ­та­лып, портал жұмысына табыс тіледі. «Егемен-ақпарат»