Рио Паралимпиадаға есігін ашты

Бүгін түн ортасы ауа Рио-де-Жанейродағы «Маракана» стадио­нында Паралимпиялық ойын­дардың салтанатты жағдай­дағы ашылу рәсімі болды. Мұн­да да қатысушы спортшылар деле­гациясының өкілдері шерулетіп жүрді. Қазақстан туын суда жүзуші Әнуар Ахметов көтеріп өтті. Осынау атақты спорт арена­сында мұның алдында XXXI жазғы Олимпиялық ойындардың ашылу және жабылу салтанаты болып өткен еді. Енді паралимпиадашылар да сол саңлақтар шыққан жарыс жолдарында күш сынасады. Олар сайыстың 22 түрінен 528 медаль жиынтығын сарапқа салады. Бағдарламада академиялық ескек есу, отырып баскетбол, волейбол, регби және теннис ойнау, арба үстінде семсерлесу, бочче, велоспорт, атпен жүру, голбол, дзюдо, жеңіл атлетика, үстел тен­нисі, желкен спорты, пауэрлифтинг, суда жүзу, мылтық ату, садақ ату, бес адамдық футбол, жеті адамдық футбол сияқты спорт түрлері бар. Бұлардан басқа, осы жолы алғаш рет байдарка мен каноэ­да ескек есу, триатлон сайыстары да бағдарламаға еніп отыр. Риода Отанымыздың намысын жүзушілер Әнуар Ахметов (Астана), Роман Агалаков (Оңтүстік Қазақстан), Зүлфия Ғабидуллина (Жамбыл), Наталья Звягинцева (Қарағанды),  пауэрлифтингішілер Вадим Дукарт (Ақмола), Гүлбану Әбдіхалықова (Алматы), Раушан Қойшыбаева (Алматы облысы), дзюдошылар Әнуар Сариев (Атырау),Орынбасар Құралбай (Оңтүстік Қазақстан), жеңіл атлеттер Аманат Қалқаев (Алматы), садақшы Александр Медведев (Павлодар) қорғайды. Паралимпиада бәсекелері 8 қыр­­күйекте басталып, 18-інде аяқталады.