Ғибраты мол «Ғалым» залы

Ұлттық академиялық кітапханада Қазақстан Республика­сының еңбек сіңірген ғылым қайраткері, Халықаралық жоғары мектептер ғылыми академия­сының құрметті академигі, филология ғы­лымдарының докторы, профессор Тұрсынбек Кәкі­шев­тің жеке кітапханасы – «Ғалым» залы ашылды. Осы ша­ра аясында «Мағжан – Сәкен» кітабының тұсауы кесілді. Ізгілікке толы іс-шараға Мәде­­­ниет және спорт министрі Арыс­танбек Мұхамедиұлы, Парла­мент Сенаты мен Мәжілісінің депутаттары, еліміздің зиялы қауым өкілдері қатысып, ғалым жайлы естеліктерімен бөлісті. Өткен жылы өмірден озған ғалымның жеке кітапханасында гуманитарлық ғылымдар бойынша бес мыңға жуық кітап, сондай-ақ белгілі жазушылар Сәкен Сейфуллин, Сәбит Мұқановтың өмірі мен қызметіне қатысты құнды мұрағаттық құжаттар бар. Ғалымның қолжазбалары мен басқа да материалдарынан құралған 83 папка құжат кітапханаға тарту етілді. Тұрсынбек Кәкішевтің жеке кітапханасының табысталуы – Ұлттық академиялық кітапхананың тағылымға толы дәстүрінің жалғасы, кітапхана қорын байыта түсудегі маңызды қадам деуге болады. Тұрсынбек Кә­кішевтің жеке кітапханасының ашылуына ғалымның жұбайы, филология ғылымдарының докторы, профессор Күләш Садыққызы Ахмет мұрындық болды. Рауан ҚАЙДАР, «Егемен Қазақстан»