Әуезов театры әулиелер еліне барады

Театр жаңалықтарынан құлағы түрік жүретін жандар М.Әуезов атындағы Қазақ мем­лекеттік академиялық драма театры өзінің 90 жылдығы аясында көктемде Жетісу өңіріне өнер сапарымен барып, Талдықорған және Текелі қалаларынан табыс­ты оралғанын ұмыта қойған жоқ. Театр осы үрдісті жалғас­тырып, алдағы уақытта Маңғыс­тау облысына гастрольге аттан­ғалы отыр. Сонымен аталмыш театр 22-26 қыркүйек күндері Жаңаөзен қаласына, 28 қыркүйек пен 7 қазан аралығында Ақтау қала­сына қарай жол тартпақ. Бұл жо­лы да театр ұжымын театрдың көр­кемдік жетекшісі, КСРО ха­лық әртісі Асанәлі Әшімов пен театр директоры, Қазақстанның еңбек сіңірген қайраткері Ерлан Біләл бастап барады. Тәуелсіздіктің 25 жылдығы қар­саңында Батыс өңірге бағыт алған Әуезов театры Жаңа­өзен, Ақтау қалаларындағы көрер­мен­деріне арнап 7 бірдей спектакль апара жатыр. Бірін бірі қайталамайтын тамаша қойылымдардың тақырыбы да, көтеретін мәселесі де әр алуан. Театр ұжымы ұлы ақынның тағдыр талайынан сыр шер­тетін «Абай» трагедиясы, қа­зақ қызының қайсарлығын паш ететін тұтқындағы ару – «Таңсұлу» әфсанасы, қатар­дағы құлдан Мысырдың билеушісіне көтерілген Дешті қып­шақ ұла­ны Сұлтан аз-Захир Бей­барыстың өмірі суреттелетін «Бейбарыс сұлтан» тарихи дра­масы, тәуелсіздіктің елең-алаңы мен елдің ертеңі туралы толғайтын «Қыз мұңы» драмасы, бауыр еті баласы үшін құрбан болған ана мен намыс­тан тентіреп кеткен отағасының жан күйзелісі арқау болған «Тендерге түскен келіншек» дра­масы, бақытты кездесулері баянсыз қоштасуларға ұласқалы тұрған жастардың сезімдері туралы сыр шертетін «Қоштасқым келмейді...» драмасы, Түркі дү­ниесінің ортақ тұлғасы Қо­жанасыр жайлы «Қожанасыр тірі екен...» музыкалық комедия­сы шалғайдағы көрермендер кө­ңілінен шығатынына сенеді. Пьесалар Жаңаөзен қаласында «Мұнайшы» мәдениет үйінде, Ақтау қаласында Маңғыстау об­лыстық Н.Жантөрин атын­дағы Қазақ музыкалық драма теа­трының ғимаратында қойылады. Спектакльдерде Қазақстанның еңбек сіңірген әртісі Айдос Бек­темір, Қазақстанның халық әртісі Гүлнар Жақыпова, Қазақстанның еңбек сіңірген қайраткерлері Бекжан Тұрыс, Азат Сейтметов, Асылбек Боранбай, Дәрия Жүсіп, Азамат Сатыбалды сынды көрер­мен қауымға театр және телеэкран арқылы танылып жүрген белді әртістер мен қазақ театр өнерінің майталмандары бастаған көшке жаңадан қосылған жас буын өкілдері өнер көрсетпек. Айнаш ЕСАЛИ, «Егемен Қазақстан» АЛМАТЫ