Білім нарығындағы биік белес

Л.Н.Гумилев атындағы Еуразия ұлттық университеті әлемдік білім нарығында бәсекеге қабілетті екендігін халықаралық QS World University Ranking 2016 рейтингі бойынша тағы да дәлелдеп, әлемдегі үздік 900 университет арасында 345 орынға көтерілді. Бұл әлемнің 4322 ЖОО арасындағы бәсекеде қол жеткізетін орны, яғни Қазақстан мен Орталық Азияны былай қойғанда, ТМД елдері ЖОО-лары арасында озық жетістік болып саналады. Айта кету керек, ТМД елдерінің бар­лық университеттері әлемнің 900 үздік уни­верситеті рейтингінде мұн­дай жетіс­тікке жете қойған жоқ. Ал Қазақ­станнан ЕҰУ-ден басқа 7 жоғары оқу орны еніп отыр. Олар: әл-Фараби атындағы ҚазҰУ, Қ.Сәтбаев атындағы ҚазҰТУ, Абай атын­дағы ҚазҰПУ, М.Әуезов атын­дағы ОҚМУ, ҚБТУ, Е.Бөкетов атындағы ҚарМУ және Абылай хан атындағы Қазақ халықаралық қатынастар және әлем тілдері университеті. Рейтинг көшбасында жылдағыдай Америка мен Ұлыбритания универси­теттері – Массачусетс технологиялық, Стенфорд, Гарвард, Кембридж уни­вер­си­тет­тері мен Калифорния техно­логиялық инс­титуты тұр. ЕҰУ бұл байқауларға 2009 жылдан бері тұрақты қатысып келеді. Соң­ғы бір жылда 26-орынға көтерілген оқу орны Қазақстан және Орталық Азия уни­верситеттері арасында айтулы жетістікке қол жеткізді. Сонымен қатар, соңғы жылдары Quacquarelli Symonds (QS) халықаралық компаниясы ашылғанына 50 жыл толмаған әлемнің ЖОО арасында «QS Top 50 Under 50» деген жаңа рейтингі нәтижесінде ЕҰУ 32-орынға тұрақтады. Бұл рейтингке ТМД-ның бір де бір университеті ілінбегенін ескерсек, на­ғыз ілгерілеудің үлгісі және үш жыл қа­тарынан 32, 38 орындарды ұстап келеді. Еуразия ұлттық университеті Еуро­па ғылыми-өнеркәсіптік палатасы «Еуро­па­лық стандарт: жоғары оқу орын­дары­ның рейтингі»: көрсеткіші бойынша да әлем­нен 2 678 ЖОО-сы қатысқан бай­қау­да Қазақ­стандағы 23 жоғары оқу орындары арасынан жетекші бестікке енді. Құрылғанына не­бәрі 20 жыл болған оқу орны­ абыройын асқақтатқан бұл көрсет­кіш­тер білім беру ісі сапасының артып, әлем­дік стандарттарға сай жарақ­тан­дыры­луын төрткүл дүниеге дәлелдесе керек. QS рейтингі негізгі алты көрсеткіш бо­йын­ша бағалайды. Олардың ішінде оқу орны­ның академиялық беделі, жұмыс беру­­шілер арасындағы абыройы, шетел сту­­ден­т­тері мен халықаралық деңгейдегі оқы­ту­­шы­лар құрамы секілді жайлар ескері­леді. Сондай-ақ, Л.Н.Гумилев атындағы Еуразия ұлттық университеті екі жыл қатарынан Білім сапасын қам­там­асыз ету  тәуелсіз қазақстандық агенттігі (БСҚА) қорытындысы бойынша да көш бастап келеді. «Егемен-ақпарат»