Ресейде Қазақстанның әскери өнімдері ұсынылды

Ресейде әскери және қос мақсаттағы қазақстандық өндірістің 50-ге жуық бұйымы ұсынылды, деп жазды Қорғаныс министрлігінің ресми сайты. Ұжымдық қауіпсіздік туралы шарт ұйымының делегациясы Бас хатшы Николай Бордюжаның басшылығымен «Армия-2016» халықаралық әскери-техникалық форумы барысында қазақстандық стендті тамашалады. «Қазақстан инжиниринг» ҰК» АҚ басқарма төрағасы Ерлан Ыдырысов ұлттық компанияның қызметі туралы әңгімелеп, меймандарды техника мен қару-жарақтың жаңа үлгілерімен таныстырды. Форумда еліміздің алты кәсіпорны өнімдерін ұсынды. Олар: «Қазақстан Парамаунт Инжиниринг» ЖШС, «КАЕ» ЖШС, «С.М. Киров атындағы зауыт» АҚ, «С.М. Киров атындағы машина құрастыру зауыты» АҚ, «№405-авиажөндеу зауыты» АҚ және «Zhasampaz» консорциумы. Компанияның стендінде әскери және қос мақсаттағы бұйымдардың 46 табиғи үлгісі мен 13 сұлбасы қойылған. Олардың арасында түнгі көру көздеуіштері, жылу визиялық жүйелер, барлау және қадағалау аспаптары, корабльдер мен суасты қайықтарды өндірушілерге арналған кеме гидравликасының толымдаушы бұйымдары, Ми-17В-5, Ми-8 тікұшақтарының сұлбалары, сондай-ақ, қазақстандық өндірістің броньды кеудешелері, шлемдері мен әскери киім-кешегі бар. Айдар ӨРІСБАЕВ