09 Қыркүйек, 2016

Бүгін футзалдан әлем чемпионаты басталады

245 рет
көрсетілді
1 мин
оқу үшін
fut-768x432Қазанның 1-іне дейін созыла­тын Колумбиядағы додаға Қазақстан ұлт­тық құрамасы да қатысады Жаһандық жарыста еліміздің намысын қақпашылар Игита, Александр Гуров, алаңдағы ойыншылар Дінмұхамбет Сүлейменов, Шыңғыс Есенаманов, Дәурен Нұрғожин,  Эвертон,  Михаил Пер­шин қорғайды. Олардың бәрі  «Қайрат» командасында ой­найды. Бұдан басқа әлемдік до­даға «Тұлпардың» Павел Таку, Алек­сандр Довгань, Арнольд Кнауб пен Николай Пенгрин есім­ді төрт ойыншысы қатысады. Ал Лео деген шабуылшымыз Порту­га­лияның «Спортинг» клубынан келіп қосылды. Қазақстан құрамасы алғашқы матчын 13 қыркүйек күні Арген­тинамен өткізеді. Одан кейін Кос­та-Рика және Соломон аралдары футзалшыларымен күш сынасады. Өткен аптада ұлттық құра­ма Австралия командасымен жол­дастық кездесу өткізді. Жер­лес­теріміз онда 2:1 есебімен же­ңіске жетті. Ойын команданың дайын­­дығын пысықтау үшін өт­кізілді. Қазақстан құрамасы жыл ба­сында Сербияның Бел­град қала­сында өткен Еуропа чем­пио­на­тының қола жүлдесін ал­ды. Одан кейін Польша құра­масымен әлем чемпионатына жолдаманы са­рапқа салған сырт алаңдағы ойынын 1:1 есебімен тең аяқтап, өз алаңында 7:0 етіп ұтты. Сосын Таи­ландта өт­кен халықаралық турнирде же­ңімпаз атанды. Жалпы, әлем чемпионатына Қазақстан осымен екінші рет қатысқалы отыр. Алғаш рет 2000 жылы Гватемалада өткен ІV әлемдік додаға қатысқан болатын. Бірақ онда командамыз сүреңсіз нәтиже көр­сеткен. Сол кезде Қасымжан Мә­диев жаттықтырған жігіттеріміз А тобында Бразилиядан 1:12, Португалиядан  2:6,  Гватемаладан 5:6 есебімен ұтылған. Енді, міне, ара­ға 16 жыл салып, Колумбияда өте­тін ХІІІ әлем чемпионатына аттан­ды. Додада 24 құрама бақ сынасады. Дастан КЕНЖАЛИН, «Егемен Қазақстан»