Шетелдік қылқалам шеберлері

Алматының 1000 жылдығына тарту жасады Тамыз аяқталар тұста Жетісу өлкесінің көрікті жерлерінде 12 елден келген, 30-ға тарта қыл­қалам шебері мен 60-тан астам фотосуретші бас қосып, «Ұлы Дала бояулары» атты ха­лықаралық симпозиумды бастап берген-ді. Алматылықтар сол суретшілердің қолынан шық­қан ғажайып өнер туындыларын тамашалайтын күн де келіп жетті. Сонымен, мегаполистегі «Мега» ойын-сауық орталығында пле­нэрлік жұмыстардың көрмесі өтті. Анығырағы бұл симпозиум 26 тамыз күні бастау алған болатын. Симпозиум барысында сурет­шілер мен фотосуретшілер  «Көлсай көлдері» мемлекеттік ұлттық табиғи паркінде, Шарын шатқалында, «Таңбалы тас» қо­рығында, Үшқоңырда, Алатау бөктерінде, Алматы қаласы мен Алматы облысының көрікті жер­лерінде болып, Ұлы Дала – Қа­зақ елінің әсем жерлері мен та­биғатын, тауы мен даласын суретке түсіріп, ғажап көрінісін әр қырынан салды. Ресей, Қытай, Корея, Польша, Армения, Қырғызстан, Венгрия, Финляндия сияқты шет мемлекеттерден келген суретшілер ұлттық қорықтардың тарихымен, өсімдіктері және жануарлар дүниесімен де танысып, саяхат жасап қайтты. Көрменің ашылуында аталмыш шараның ұйымдастырушысы, Қазақ мемлекеттік қыздар педа­гогикалық университетінің ректоры Динар Нөкетаева: «Бүгінгі көрмеде шетелдік суретшілермен қатар, қазақстандық суретші­лердің де тың туындылары қойы­лып отыр. Қазақ даласының әсем бейнесін, көркемдігі мен кере­меттілігін кенепке түсірген нағыз таланттар – қылқалам шебер­лерінің суреттері тарихқа қосыл­ған үлес және Алматы қаласының 1000 жылдығына үлкен тарту болмақ!», деді. Осы арада көрмені тегін ұйымдастыруға «Astana Group» компаниясының президенті, белгілі кәсіпкер Нұрлан Смағұлов пен «Қазақстан Халық банкі» АҚ Директорлар кеңесінің төр­ағасы Александр Павлов мұрын­дық болғанын айта кеткен жөн. «Мен қашан да бейнелеу, сурет өнерін қадірлеймін, әрқа­шанда қолдаймын. Алматының 1000 жылдығына орайластырылып отырған бұл шараға біз де атсалысқанымызға қуа­ныш­ты­мыз. Бірінен бірі ерекше­ле­нетін суреттердің барлығы кө­ңілімнен шықты, ерекше әсер алдым», деген кәсіпкер-кол­лек­ционер Нұрлан Смағұлов су­рет­шілердің туындыларын ойын-сауық орталығында саты­лымға қоюды ұсынды. Бір аптаға жалғасатын көрмеге келушілер суретшілердің туындыларын тамашалап қана қоймай, сатып алуға да мүмкіндік ала алады. Көрмеге пленэрде салынған суреттермен қатар, қылқалам шеберлерінің бояуы кеппеген туын­дылары да қойылды. Фото­суретшілер де өз елдерінен ала кел­ген таңдаулы деген өз сурет­терін өнерсүйер қауым назарына ұсынды. Шара соңында симпозиумға қатысқан суретшілер сертификаттармен және арнайы дипомдармен марапатталды. Айнаш ЕСАЛИ, «Егемен Қазақстан» АЛМАТЫ