Алдағы 5 жылда 600 мың гектар егістік жерлерін айналымға енгізу керек - Елбасы

Алдағы бес жылда кемінде 600 мың гектар суармалы егістік жерді айналымға енгізу керек . Бүгін Ақордада өтіп жатқан ҚР Үкіметінің кеңейтілген отырысында Мемлекет басшысы Нұрсұлтан Назарбаев Үкіметке осы мәселені жүктеді деп хабарлайды Қазақпарат. «Ауыл шаруашылығы министрлігі мен әкімдер ауыл шаруашылығы жерлерін тиімді пайдалануға қатаң бақылау жасауы керек. Бұл жерлерді апатты су қоймаларын жөндеу мен жаңаларын салу арқылы сумен қамтамасыз ету қажет. Бұл да ұдайы айтылады. Суға тапшы елміз. Мәселен, биыл қар қалың болды, су ағыл-тегіл. Мол судың бәрі қайда кетті. Әрине, осыны дұрыс пайдалана алмадық деген сөз», -  деді Н. Назарбаев. «Мен тіпті Кеңес одағында осы мәселемен айналысқанмын. Қазақстан далаларында мыңдаған құдықтар бар еді. Құдық бар жерде мал шаруашылығы да жақсы дамиды. Ол болмаса түк те жоқ», - деді Елбасы. Президент бұл ретте су ресурстарымен Үкімет арнайы айналысуы тиістігін де атап өтті. Елбасының айтуынша, ең бірінші кезекте Үкімет қай жерде қандай тоғандар салынуы қажеттігіне баса назар аударатын болады.