«Егеменді» іздеп елеңдейді

Ақ жаулығы желбіреп, ақша жүзі елжіреп, Зейнеп апа «Егеменге» тағы келе жатыр екен. Тағы дейтінім, бұл кісі біздің редак­цияға күнде бол­ма­ғанымен, жиі бас сұғады. Тұрақ­ты оқырма­ны­мыз. Жинап қойған бір бума газетті редакциядан өзі алып кетеді. «Қан­ша деген­мен, қаланың ішіндесіз, қазір газетті жеткізудің басқа да жол­дары бар емес пе, неге әуре бола­сыз», дейміз газет алуға сонау жер­­ден автобуспен келіп жүр­ген қария­ның қажырына қай­ран қалып. Қалай дегенмен, сексеннің сеңгіріне тақаған жасы бар. Бірақ бұл оқырманымыздың артық­шылығы да осында, өзінің сөзі­мен айтқанда, «газетті өз аяғы­мен келіп, өз қолы­мен» алған­ды ұна­тады. Осылайша, газет оқу­ды өмірлік әдетіне айнал­­дыр­ған ерекше оқырман «Еге­мен­нің» ешбір нөмірін қалт жібер­мейді. «Егеменіңіз» не, бұл кісі «Социа­листік Қазақстаннан» бергі тұрақты оқырман. Қария қасына қатарласа қосылған мені бірден тани қой­маса да, амандығыма мейі­ріммен жауап қатып, аңқылдай сөйлеп, мәре-сәре болып қалды. Бұл да болса, оның ел газеті ­– «Егеменге», ондағы еге­мен­діктерге деген ерекше құр­меті. «Егемен» елдің бас басы­лымы, елдің бүкіл тыныс-тірші­лігінің айнасы ғой. Аллаға шүкір, көзім аманда «Егеменімді» оқып өтемін», дейді Зейнеп Құбаш­қызы. Сүйсінесің. Газетке деген құштарлықтан қуат алған қария­ның қайратына қызығасың. Ойпырым-ай, осы «жұрт газет оқымайды» дегенді кім айтты екен?! Керісінше, заман озған сайын оқымысты көп қазір. Шүкір, оқысам, білсем дейтін ұрпақ­тың ұмтылысы ұшқыр. Әр оқырман әр басылымнан өзіне керегін іздейді. Біреу бұрынғыша қағаз түрін қолайлы көрсе, енді бірі Интернетке икемді. Соған сай басылымдар да басты талаптарға басымдық беріп, оқырманның сұранысынан шығуға тырысады. Қалай болғанда да, біреу ізденіп оқыр, біреу қажеттіліктен оқыр, бас­тысы, оқырмансыз газет жоқ. Әрине, газет үшін әрбір оқыр­ман маңызды. Алайда 78-де жасы бар ақ жаулықты ана­ның бас басылымға бас иіп, қарашаңыраққа құрметпен қарауы­ның жөні бір бөлек екен. Динара БІТІКОВА, «Егемен Қазақстан» АСТАНА Суретті түсірген Ерлан ОМАРОВ, «Егемен Қазақстан»