Елордада Атырау мен Батыс Қазақстан жәрмеңке ашты

«Қуатты өңір – қуатты Қазақстан» акциясы аясында Астанада Атырау жане Батыс Қазақстан облыстарының күндері өтуде. Бүгін Ханшатыр СОО алдындағы алаңда аталған облыстардын тауар өндірушілерінің ауылшаруашылық жәрмеңкесі басталды. Жәрмеңкеге Батыс Қазақстаннан 200 тоннадан астам тауар әкелінсе, Атырау облысынан 34 тауар өндіруші қатысып, жалпы көлемі 90 тонна өнім саудаға шығарылды. Астаналықтарға балық, көкөніс, сүт және ет өнімдері, шұжық өнімдері, салат, жұмыртқа және тағы басқа қырыққа тарта өнім түрлері ұсынылды. Әсіресе, балық пен балық өнімдеріне сұраныс өте жоғары болып тұр. – Осыдан бірнеше жыл бұрын жәрмеңкеге тек балық пен балық өнімдерін әкелген едік. Биыл тауарларымыз біршама көп. Себебі облыстарда қазір өнім түрлері көптеп өндіріледі. Кәсіпкерлеріміз жәрмеңкеге құлшыныспен келді. Олар үшін бұл шара өнімдерін өткізуге және жарнамалауға үлкен мүмкіндік, – дейді Атырау облысының әкімі Әлібек Наутиев. Жәрмеңке кезінде облыстың шығармашылық ұжымдарының қатысуымен концерттік бағдарлама өтіп, сатып алушылардың көңілін көтеруде. Арнұр АСҚАРОВ