Балғындарды спортқа баулыды

Алматыда Тұңғыш Президент қорының мұрындық болуымен «Аман келешек» атты жасөспірімдердің мәдени-спорттық фестивалі өтті. Төрт мыңға жуық мектеп оқу­шысы осымен үшінші жыл бір орталыққа жиналып, саламат­ты өмір салты туралы әңгіме мен әдемі ойын-сауыққа кенеліп қайтты. «Барлық бала үшін күз айы тосын сый мен мерекеге толы ғой. Біздің өткізіп отырған шарамыз да оқушылардың өміріне серпін беретін, айнала қоршаған ортаға деген құштарлықты оятатын дәс­түрлі фестиваль. Әсіресе, жас ұрпақ­тың дені сау болып өсуі бүгінгі қоғамның басты міндеті. Балаларды спортқа бау­лу мен саламатты өмір салтын сүюге үйрету үшін қолдан келгеннің барлығын жасауымыз керек. Біздің шарамыз оқып, үйрену бағытында және әр баланың спорттық қабілетін шыңдауына жол ашады» дейді Тұңғыш Президент қорының атқарушы директоры Сағындық Нұраханов. «Аман келешек» фестивалі жыл сайын жаңа буын оқушы­лардың қатысуымен қызықты өтіп, жалғасуда екен. Ұйым­дас­тырушылар биыл жасөс­пірімдерге тосын сый жасап, шараға еліміздің белгілі спорт шебер­лерін шақырыпты. Осы күні Олимпиада және әлем чем­пиондарының қолын алған оқушылар шаттыққа кенел­ді. Фестивальде Василий Жиров, Юрий Мельниченко, Илья Ильин, Дариға Шәкімова, Мақсұт Жұмаев, Назым Қы­зай­бай, Болат Жұмаділов сияқты майтал­мандар жас спортшыларға ақыл-кеңес беріп, олардың өнерін тамашалады.  Қалмаханбет МҰҚАМЕТҚАЛИ, «Егемен Қазақстан» АЛМАТЫ