Қыр астында тұрған қатал маусым қарсаңында өңірлерде атқарылған ауқымды жұмыстар барысын тілшілеріміз баяндайды.
Петропавлдан – Өмір ЕСҚАЛИ
Алты ай бойы ақ көрпесін айқара жамылатын теріскей үшін қыс – қатал сынақ. Үскірік аязы мен долы боранын ала келетін «кәрі құдаң» «ұшпадай бөркін киіп оқшырайтып» әлек салғанда қаһарына төтеп беру оңай емес. Сондықтан, ауа райы қытымыр өңірде алдағы жылыту маусымына жан-жақты дайындық жасамай болмайды. Энергетика және тұрғын үй-коммуналдық шаруашылық басқармасының басшысы Тасмұрат Қатқадамовтың мәліметтеріне қарағанда бюджеттік ұйымдарға 170 мың тонна көмір жеткізілген. Жылу электр кәсіпорнының №12 қазандық орталығы мен №5 турбоагрегаты жуық арада пайдалануға беріледі. Сонда жыл соңына қарай электр қуатын 541 мВт-қа, ал жылуды 713 Гкал/сағатқа дейін арттыруға мүмкіндік туады. Облыс орталығындағы 76 білім беру, 30 емдеу мекемелеріне жылу ерте беріліп, балалар мен науқастардың қамы бірінші кезекте ойластырылған. 72 ғимаратты күрделі және ағымдық жөндеуден өткізу үшін 343 миллион теңге бөлінген. Дегенмен, көпқабатты тұрғын үйлердің жылу құбырлары шаю, қысымын тексеру шараларын атқаруда баяулық басым. Оның бір себебі пәтер иелері кооперативтері мен жекелеген тұрғындардың салғырттығына келіп тіреледі. Сол сияқты ауыл мектептеріне қатысты түйінді мәселе де жоқ емес. Атап айтқанда, көбінің жылыту қазандықтары оқу ғимараттарының ішінде орналасқан. Қазіргі қауіпсіздік талаптары бойынша қазандық сыртта болуы тиіс. Мемлекеттік бағдарлама шеңберінде Петропавл қаласындағы 1048 көпқабатты баспананың 288-іне жылу есептегіш құралдары орнатылған. Жоспар бойынша 537 үйге қою көзделгенімен, кей тұрғындар жобаның маңыздылығынан, қондырғылардың тиімділігі мен артықшылығынан хабарсыз. Есептегіш құрылғыларды орнатқан кезде 4 жылға бөліп төлеу жеңілдігі қарастырылғанын, жылу ақысы 60 пайызға дейін үнемделетінін біле бермейді. Көпқабатты үйлерге жылу 1 қазаннан бастап берілетінін ескерсек, әзірлік жұмыстарын тыңғылықты атқарып шығуға әлі уақыт бар.Қарағандыдан – Қайрат ӘБІЛДИНОВ
Биыл жұрттан бұрын жылуды Қарағанды мен Теміртаудың тұрғындары алатын болды. Бұл қалаларда жылыту маусымы 1 қазаннан бастап күшіне енеді. Он күннен кейін, яғни 10 қазан күні Жезқазған, Саран және Шахтинск қалалары жылу жүйесіне қосылмақшы. Ал қалған өңірлер үшін жылу берілетін күн 15 қазан деп белгіленген. Жоғарыдағы ақпаратты облыстық энергетика және тұрғын үй-коммуналдық шаруашылық басқармасының басшысы Қайрат Бегімов мәлім етті. «Қалалар мен аудандар және әзірлік актісі берген деректерге сәйкес, қыс мерзіміндегі жұмысқа білім беру (780 нысан), денсаулық сақтау (269 нысан) басқармаларындағы нысандар толығымен дайын. Ал мәдениет (99,2%), спорт (97,5%) салаларындағы нысандар аз күннен кейін дайындықты аяқтайды. Қазірдің өзінде 6314 көпқабатты тұрғын үй (94%) қысқа дайын». Сонымен қатар, Қайрат Бегімов бүгінгі күнде облыс бойынша қазандықтарды қалпына келтіріп, жылыту жүйелерін жөндеу жұмыстарының жоспарға сәйкес жүргізіліп жатқанын атап өтті. Жалпы, биылғы қыс маусымына деген дайындық барысы облыс басшылығының қатаң бақылауына алынған. Таяуда өткен аппарат жиынында облыс әкімі Нұрмұхамбет Әбдібеков күн тәртібіндегі бұл мәселенің айрықша өзектілігіне назар аударды. – Бізде әлі де болса уақыт бар, сондықтан да, бұл бағыттағы жұмыстарды мейлінше ширатып, кедергілерді жеңе білу керек. Күзгі-қысқы жылыту маусымын дер кезінде әрі сапалы бастау, кемшіліктерге жол бермеу – басты міндет, – деді өңір басшысы. Сонымен қатар ол, қысқы жылу беру маусымына дайындық барысы мен оның сапалы өткерілуі қалалар мен аудандар әкімдерінен қатаң түрде сұралатынын ескертті.Шымкенттен – Бақтияр ТАЙЖАН
Оңтүстік Қазақстан облысында қыс мезгілі ұзақ емес, қоянның құйрығындай келте. Солай бола тұра, кей жылдары жылу беру маусымы кезінде шідерлеулі аттай кібіртіктеп, проблемаларының көбейіп кететіндігі бар. Биылғы дайындық барысы жайлы осы салаға бірден-бір жауапты маман, облыстық энергетика және тұрғын үй-коммуналдық шаруашылық басқармасының басшысы Марғұлан Марайымның түйінді сөзін тыңдадық. Ол 1 қарашаға дейін барлық проблемаларды шешеміз деп отыр. Мәселен, облыстың 2016-2017 жылдардағы жылу беру маусымына дайындық биылғы 5 сәуірден басталып, бүгінгі күнге дейін бұл мәселе 3 рет Үкімет тарапынан өткізілген селекторлық мәжілісте, 5 рет Энергетика министрлігінің Атом, энергетикалық бақылау және қадағалау комитеті тарапынан өткізілген селекторлық мәжілісте, 3 рет облыс әкімдігінің кеңейтілген селекторлық мәжілісінде қаралып, нақты тапсырмалар берілген. Жалпы алғанда, облыс бойынша 3272 мекеменің алдағы жылу маусымына дайындалғаны 3268 екен. Былай айтқанда, 99 пайыз. Ең өзекті білім беру мекемелері бойынша 1510 нысан, денсаулық сақтау бойынша 951 нысандар жылу маусымына 100 пайыз дайын. Ал әлеуметтік сала бойынша 4 нысан құрылысы толық аяқталмағандықтан дайындығы күрделілеу күйде қалып отыр. Облыстағы 3272 бюджеттік мекемелердегі 1108 кіші қазандықтың 374-іне жөндеу жұмыстары жоспарланып, 1 қарашаға дейін толық бітеді. Облыстағы күрделі мәселенің бірі – «3-Энергоорталық» акционерлік қоғамының «ҚазТрансГаз» АҚ-қа қарызы 1686 млн теңгеге жеткендігі. Осыған байланысты, «Энергоорталық» осы айдың соңына дейін 700 млн теңгені төлеуге «ҚазТрансГаз»-бен келісімге келіп, хаттама толтырған. Газ тасымалдаушы «ҚуатЖылуОрталық-3» МҚК ТЭЦ-3-тің қарыздарын 2017 жылдың 1 сәуіріне дейін толық төлеуді мойнына алды.Ақтаудан – Гүлайым ШЫНТЕМІРҚЫЗЫ
Маңғыстау облыстық энергетика және тұрғын үй-коммуналдық шаруашылығы басқармасының мәліметінше, өңірдің аудан, қалалары жылыту маусымына толықтай дайын болып барады. Қысқа дайындық, құбырларды жөндеу, бөлшектерді ауыстыру жұмыстары үшін жергілікті бюджеттен биыл 97 млн теңге бөлінген. Қазір бұл қаражатқа қажетті құрал-жабдықтар сатып алынуда. – Сабақ басталды, енді аз күндерден соң мектеп, балабақшалар ғимараттары салқын тартуы мүмкін. Сондықтан, біз бұл мәселеге айрықша мән береміз. Өңірдегі 305 білім беру нысаны жылыту маусымына сақадай сай тұр. Ал денсаулық сақтау саласына қатысты 97 нысанның 96-сы дайын. Бір нысандағы жұмыстар маусым басталғанға дейін аяқталатын болады, – дейді Маңғыстау облыстық энергетика және тұрғын үй-коммуналдық шаруашылығы басқармасының бас маманы Абылай Төреханов. Маңғыстауда өткен жылы қыс аса қатты суық болған жоқ. Сондай-ақ, мамандардың айтуынша, қыс мезгілінде өңірде апатты жағдайлар орын алмаған. Ағымдағы және күрделі жөндеулерді жүргізіп, бірқатар орындарға су жаңа тетіктерді қондырған құзырлы орындар биылғы қысқа да әзірміз деп отыр. Санаулы күндерден соң басталатын жылыту маусымы құзырлы орындардың тегеурінді жұмысын қажет етеді және оларға зор жауапкершілік жүктейді. Маңғыстауда күн жылы болады дегенмен, қыстың аты қыс. Жылусыз бір күн отыру еш мүмкін емес. Сондықтан, жұмыстардың сапалы жүруі – тиісті мекемелер үшін де, тұрғындар үшін де аса маңызды.
