«Париж келісімі» жобасы жұмыс тобында талқыланды

Парламент Мәжілісінде «Париж келісімін ратификациялау туралы» заң жобасы бойынша жұмыс тобының отырысы болды. Жұмыс тобының жетекшісі Ерсұлтан Бектұрғанов өз сөзінде Қазақстан ғаламдық климаттың жақсаруы бағытындағы халықаралық келісімдерге қосылып отыратынын жеткізді. Ол «Қазақстан-2050» Стра­те­гиясы экономиканың тиімді моделін ұстанып, еліміздің жаңа «жасыл» жол дамуына өтудің негізіне нақты бағыт көрсетіп отырғанын атап өтті. Климаттың ғаламдық өзгеруінің басты мәсе­лелерін шешудің тағы бір кезеңі үстіміздегі жылы қол қойылған Париж келісімі болып табылады. Қоршаған ортаға ерекше көңіл бөліп, «Болашақтың энергиясы» деген атпен өткелі отырған ЭКСПО-2017 халықаралық көр­месі қарсаңында Париж келісі­мінің орны бөлек болмақшы. Отырыста сөз алған Энерге­тика министрінің орынбасары Ғани Сәдібеков «Париж келісімі» 2015 жылғы желтоқсанда Бірік­кен Ұлттар Ұйымының Кли­мат­тың өзгеруі жөніндегі негіздемелік конвенциясының Париж қаласында қабылданғанын мәлімдеді. Бұл келісім орнықты даму және кедейлікті жою жөнін­дегі күш-жігермен қатар, климат­тың өзгеруі қаупіне жаһандық ден қоюды күшейтуге бағытталады. «Париж келісімі» орнықты даму саласындағы мақсаттарға жетуге ықпал етеді және климаттың өзгеруіне тұрақтылықты нығайту­ға мүмкіндік беретін шаралардың «жол картасы» болып саналады. Сонымен бірге, «Париж келісімі» шеңберінде климаттың өзгеруіне бейімделу жөніндегі ережелер қамтылады. Заң жобасын жасаушылар атап көрсеткендей, «Париж келі­сімін» ратификациялаудың халықаралық деңгейде де саяси ықпалы жоғары. Мемлекет басшысының «болашақтың энергиясы» және «жасыл» экономика туралы айтқанындай, климаттың өзгеруіне айрықша әсері болады. Күн тәртібіндегі мәселені талқылау барысында «Табиғат» экологиялық қауымдастығының жетекшісі Мэлс Елеусізов су мен орманға, мұздықтар мен қал­дық­тарға қатысты мәселелерді қоз­ғады. Жиналғандарды баламалы куат көзін іздестіруге шақырып, қаржыландыру көзі табылып жатса, қоршаған ортаны қорғауға, кли­­мат­тың өзгеруінің алдын алуға жұм­сау туралы ұсынысын білдірді. Басқа да сөз алғандар эко­логия­лық бағдарламаларды жүзе­ге асырып, қоғамдық көлік­тер­ді халықаралық талаптарға сәй­кес дамыту қажеттігін айтты. Де­пу­тат Бейбіт Мамраев жоғары оқу орын­дарында эколог-мамандар­ды даяр­лау қажеттігіне баса на­зар аудар­ды. Ал депутат Май­ра Ай­си­на елдің арасын­да, әсі­ресе, жас­­тар­мен және ірі өнді­ріс орын­да­рын­да эко­ло­гия­лық сауатты­лық­­ты жүргізу қаже­ттілігіне тоқ­талды. Жұмыс тобының жетекшісі Е.Бектұрғанов күн тәртібіндегі мә­селені қорыта келе, айтылған ұсы­ныстардың бәрі тиесілі орындар тарапынан ескерілетінін атап өтті. Ғабит ІСКЕНДЕРҰЛЫ, «Егемен Қазақстан»