Таяуда жауынгерлік дайындық жоспарына сәйкес Жамбыл облысындағы Мәтібұлақ полигонында бригадалық-тактикалық жаттығу өткізілді. Оны жүргізу барысындағы қаруды оқтау кезінде мина өздігінен жарылып кетті. Соның салдарынан келісімшарт қызметінің екі әскери қызметшісі: кіші сержант Е.Ошаев пен қатардағы жауынгер Ғ.Сұлтанов қаза тапты. Аға лейтенант Е.Сетибаев, келісімшарт қызметінің қатардағы жауынгері М.Шалдарбеков жарақат алды. Оларға Алматы қаласындағы Әскери клиникалық госпитальда қажетті медициналық көмек көрсетілуде. Қазіргі уақытта қатардағы жауынгер М.Шалдарбековтің жағдайы орта дәрежеде, ал аға лейтенант Е.Сетибаевтікі қанағаттанарлық қалыпта.
Зардап шеккендерге материалдық көмек көрсетілетін болады. Оқиға орын алған жерде оның мән-жайы мен себептерін анықтау үшін құзырлы комиссия жұмыс істеуде және Ішкі істер министрлігінің әскери-тергеу басқармасы Гвардеиский гарнизоны бойынша тергеу шараларын жүргізуде, деп хабарлады Қорғаныс министрлігінің баспасөз қызметі.