Татарстан өкілдігінің жаңа ғимараты ашылды

Кеше Астанада Татарстанның Қазақстандағы Өкілетті өкілдігінің жаңа ғимараты ашылды. Ашылу салтанатына Астана қаласының әкімі Әсет Исекешевпен бірге, Қазақстанға екі күндік ресми сапармен келген Татарстан Республикасының Президенті Рустам Минниханов қатысты. Алғашқы сөзді Астана қала­сының әкімі Әсет Исекешев алып, жаңа ғимараттағы әріптестік екі елдің арасындағы қарым-қаты­нас­тарды тереңдете түсуге қызмет ететіндігіне сенім білдірді. Мұн­дай шаралар біздің жақын досты­ғымызды дәлелдейді. Халық­тарымыз тамыры тереңге кеткен туыстық, достық қарым-қаты­наста. Жаңа ғимарат та сол үр­діске қызмет етері сөзсіз. Сон­дықтан сіздерді жаңа табыспен құттықтаймын, деді ол. Татарстан Президенті Рустам Минниханов өзінің сөзінде осындай тамаша ғимаратта ашылып тындырымды жұмыс істеп отырған Өкілдік екі халықтың, екі елдің достығы мен экономикалық ынтымақтастығын тереңдете түсетініне сенімін білдірді. Біздер – түркі әлеміндегі ең жақын халықтармыз. Қазақстанға келген сайын соны сезінеміз. Біз Қазақ­стандағы татар диаспо­ра­сы­ның да туыс­қан халықтың орта­сында тамаш­а өмір сүріп жат­қанын жақсы білеміз. Олар өздерін «қазақ­стандықтармыз» деп атап, тілі мен дәстүрін сақ­тау­ға мол мүмкіншілік жасап отыр­ғаны үшін Қазақстан бас­шы­лығына ризашылығын білдіруде. Сондықтан да сіздерге бек зур рах­мат дейміз, деді ол өзінің сөзінде. Сонымен қатар, ғимараттың ашылу салтанатына Ресей Феде­ра­циясының Қазақстан Респуб­ли­касындағы елшілігінің кеңесшісі Виктор Нефедов те қатысып, сөз сөйледі. Есілдің сол жағалауындағы «BI Village Deluxe-1» коттедждер қалашығында орналасқан бұл шағын ғимарат алаңсыз жұмыс істеуге өте  ыңғайлы. Айналасында көлік шуы жоқ, қаланың мазасыз тірлігі сезілмейтін жайлы жерде енді Татарстанның қызыл-жасыл туы желбіреп, туысқан халықтың бір ұясындай болып тұратын бол­ды. Айта кететін жайт, Астанада Қазақстан мен Татарстанның сау­да-экономикалық, ғылыми-тех­ни­калық және мәдени ынты­мақ­­тастығын жандандырып отыратын Өкілдік ашу туралы бірлес­кен келісімге 1997 жылдың 25 тамы­зында қол қойылған. Бұл Өкіл­дік заңды тұлға ретінде Қазақ­станда 1998 жылғы 26 қазанда тір­келіп, жұ­мыс істеп жатыр. Мі­не, енді ол жа­ңа ғимаратқа көшіп отыр. Татар­станның Қазақстан­дағы Өкіл­дігінің басшысы – Рүс­тем Валиул­лов. Өкілдік ғимаратының ашылу салтанатына Қазақстандағы татар этномәдени бірлестігінің облыстардағы өкілдері де қатыс­ты. Олар Астанаға Татарстан Пре­зиденті Р.Миннихановпен кезде­суге келген еді. Кездесу бір күн бұрын «Қазмедиа» орталы­ғында өткен болатын. 2009 жыл­ғы санаққа қарағанда, қазір Қазақ­станда 200 мыңнан астам татар тұрады. Татар этномәдени бірлес­тіктері барлық облыстарда ашыл­ған, олар екі қауымдастыққа біріккен. Жақсыбай САМРАТ, «Егемен Қазақстан»