Украина парламенті Ресейден шыққан кітаптарды кіргізуге тыйым салмақ

Украина Радасының комитеті Ресейде шығарылған кейбір кітаптарды Украинаға кіргізуге тыйым салатын заң жобасын мақұлдады. Бұл туралы ВВС орыс қызметі Украина вице-премьері Вячеслав Кириленкоға сілтеме жасап хабарлады. «Үкіметтің украин кітап рыногын Ресейде шығатын антиукраиндық мазмұндағы өнімдерден қорғау туралы заң жобасын профильді комитет мақұлдады» деп жазды ол Твиттерде. Мұның алдында заң жобасын үкімет мақұлдаған. Кітаптар антиукраиндық па, емес пе, оны анықтаумен арнайы комитет айналысады. Кириленко заң жобасы жыл соңына дейін қабылданады деп сенетінін айтты. Өткен жылы Украина кеден қызметі Ресейде шығарылған, Украинаға кіргізуге тыйым салынған 38 кітаптың тізімін жасаған болатын. Олардың арасында ультраоңшыл философ Александр Дугиннің, журналист Сергей Доренконың, жазушы Эдуард Лимоновтың, Ресей президентінің кеңесшісі Сергей Глазьевтің кітаптары бар.   Егемен-ақпарат