Жылыжайда нидерландтық агроном жұмыс істейді

Қазір Ақтөбенің сауда орындарынан жыл бойы көкөніс өнімдері үзілмейді. Бұған голландиялық технологиямен жұмыс істейтін «Izet GreenHouse» ЖШС елеулі үлес қосып келеді. Кішкене ғана кеседей қалбырға отырғызылған қызанақ тұқымының керілген жіңішке жіпті қуалай өрмелеп, сабақ салып, өнім бергенін көргенде таңғаларың сөзсіз. Бұл бұдан бес-алты жыл бұрынғы алғашқы жылыжайлар салына бастағандағы таңғалушылық болатын. Қазір бұған да ет үйреніп болды. Дегенмен, араға уақыт салып келгенімізде жылыжайдағы қызанақтың орнын қияр басыпты. Серіктестік директоры Мәлік Құсайыновтың шаруаның адамы екенін бұрыннан да білетінбіз. Үнемі ізденісте жүретін іскер жігіт әңгімені әріден өрбітті. – 2008 жылы жер телімін алып, жылыжай салуға бел будық. Таңдау жылыжай шаруашылығында әлемдік озықтар қатарындағы Голландия технологиясына түсті. Бір жылдан кейін құрылысты бастап кеттік. Технология да, материал да, оларды орнатқан мамандар да Голландиядан әкелінді. 2010 жылы желтоқсан айында жылыжай толық пайдалануға берілді, қызанақ тұқымы да сол елден жеткізілді. 2011 жылы сәуірде алғашқы өнімді жинадық. Бес жыл қатарынан қызанақ егіп, жылына 1800 тонна қызанақ жинап, өткіздік. Бұл жобаға салынған 1238 миллион теңге несиені толықтай қайтаруға мүмкіндік берді, – дейді ол пайдалы шаруаны қолға алғанына риза көңілмен. Жобаны «ҚазАгроқаржы» АҚ қар­жы­ландыруымен Голландияның «Dаlsem Hor­ticultural Projects BV» компаниясы жү­зеге асырды. Жылыжай кешенінде голландиялық тұқымдар пайдаланылады және Нидерландтан шақырылған агроном Фред ван Клинг тұрақты негізде қыз­мет істей­ді. Жылыжай толықтай газбен жылы­ты­лады. «Izet GreenHouse» ЖШС еліміздің батыс өңірін көкөніс өнімдерімен қамтамасыз етуге арналған Қазақстанның озық ин­вес­тициялық жобаларының қатарына жатады. Облыс және қала әкімдіктерінің қол­дауымен кешен облыс нарығы мен дү­кендерін өнімдермен қамтамасыз етіп отыр. Өнім минералды тыңайтқыштарды қол­дана отырып, голландиялық технология­мен, экологиялық таза әдіспен өндіріледі. Серіктестік өз өнімдерін Ресейдің Орын­­­бор облысына өткізе бастады. Қа­зір жылы­­жай кешенінде 50 адам еңбек етеді. Се­рік­тестік жылыжайда Ақтөбе ауыл ша­руа­­­шылығы колледж түлек­тері­нің тәжі­ри­беден өтулеріне жағдай туғы­зып отыр, олардың қатарынан жұмыс­қа алын­ғандары да бар. – Мұнда жұмысқа тұрғаныма көп болған жоқ. Жұмысым өзіме ұнайды, еңбек­­ақысы да тәуір. Таза да жарық жерде ең­­бек етемін, – дейді Талғат Тәменбаев. – Біз өнімдерімізге деген сұранысты ескеріп, өндірісті кеңей­туге бағыт ұстап отыр­мыз. Қалалық әкімдік жаңа жылыжай орналастыруға 3 гектар жер бөлді. Сол кезде екі жылыжайға қызанақ пен қияр­ды алмастырып егуге қол жеткіземіз. Бұл өнім­ділікті арттыра түседі деп ойлаймыз. Оған да голландиялық технология орнатылатын болады, – дейді Мәлік Құсайынов. Ауыл шаруашылығы саласындағы кәсіп­керлердің голландиялық технологияға ұмты­луларының да жөні бар екен. Нидер­ланд Қазақстан экономикасына қаржы құйып отырған ірі инвестор болып табылады. Сатыбалды СӘУІРБАЙ, «Егемен Қазақстан» Ақтөбе облысы Суретті түсірген Хайреден Раушанов