Ашық есік күні өтті

Алматыдағы Ұлы Отан соғысы ардагерлерінің қалалық емханасында Ашық есік күні өтті. Соғыс және еңбек ардагерлері, Ауған соғысының ардагерлерімен қоса, өзге де зейнеткерлер С.Д.Аспандияров атындағы ҚазҰМУ-дан арнайы шақыртылған мамандардың тексеруінен өтіп, тегін кеңестер алды. Холестерин мен қант деңгейін өлше­тіп, қан қысымын тексерткен зейнеткерлер кардиолог, эндокринолог, пульманолог, гастроэнтеролог, офтальмолог, уро­лог, хирург, невропатолог сияқты маман­дардың тегін қызметіне жүгінді.Осы емха­наның Бас дәрігерінің орынбасары Зәуре Мәкееваның айтуынша, емха­наға басқа күндері келушілер саны көп бола­тындықтан, қарттарға кезек күтіп тұрудың оңайға соқпайтынын, сон­дық­тан олар осындай ашық есік күндері көптеп келетінін айтты. Емхана мүмкіндігі аясынан тыс медициналық қызметтерді қажет ететін қарттарға арнайы диагностикалық орталықтарға тегін жолдама берілді.Іс-шараға әкімшілік, аудан­дық медициналық бірлестік өкілдері қатыс­ты. Айта кетерлігі, ашық есік күні емхана бас­шылығының ұйымдастыруымен жы­лына бірнеше мәрте өткізіліп тұрады. Қарттар күні қаладағы Ұлы Отан соғы­сы ардагерлері мен мүгедектерінің рес­пуб­ликалық клиникалық госпиталінде де дәл осындай шара өткізілді. Мира БАЙБЕК, «Егемен Қазақстан» АЛМАТЫ Суретте: Ұлы Отан соғысы ардагер­лері мен мүгедек­тері­нің республикалық клиникалық госпиталінде ем алып жатқан тараздық Ұлы Отан соғысының ардагері, 95 жастағы Мұзафар БЕРДІ­БАЕВ дәрігерлер ортасында.  Суретті түсірген Нұрманбет ҚИЗАТОВ