Есті әндер ескірмейді

Оңтүстікте Шәмші Қалдаяқов атындағы «Арыс жағасында» VII ретро-фестивалі мәресіне жетті. Биыл Шәмшінің кіндік қаны там­ған Қарақоңыр, бүгінгі Шәм­ші ауы­лы­нан басталған фести­валь «Ме­нің Қазақстаным» халық­ара­лық ән байқауына ұласты. Мәдениет және спорт ми­нис­т­р­лігі мен Оңтүстік Қазақ­стан облысы әкімдігі бірлесіп ұйым­дастырған салтанатты шара Шым­кенттегі «Түркістан» мәде­ниет сарайында ашылды. Осымен жетінші рет түндігі түріл­ген халықаралық ән бай­қауына Ресей және Қырғызстан мемлекеттерінен бөлек, Қытай Халық Республикасынан өнерлі жастар қатысты. – Халықаралық байқау болған соң оның ауқымына мән беремiз. Осы жағынан алғанда, биылғы конкурсқа Ресейден, тағы басқа көр­шi елдерден үмiткерлердiң көп қатысуы бiздi қуантады. Де­мек, Шәмшi әндерi сол елдерде көбiрек шырқалады деп ойлаймыз. Композитор туындыларын насихаттау үшiн жақсылықтың есiгi ашылар күн әлi де алда. Оны бiр ғана iс-шара аясында қамту мүмкiн емес. Мәселен, Шәмшi әндерiнiң үнтаспасы, нота жазбалары мен ән мәтiндерi жинақталған кiтап осы байқауға қатысқан үмiткерлерге берiлiп, сол арқылы шетелдегi қандастарымыздың қолына тиюi керек, – деді қазылар алқасының төрағасы, ҚР халық әртiсi Нұрғали Нүсіпжанов. «Арыс жағасында» ретро-фес­тивалі «Шәмші гүлзары» сая­бағында жалғасты. Қызылордалық Назым Сағын­тай Ш.Қалдаяқов атындағы «Менің Қазақстаным» халықаралық ән байқауының бас жүлдесін жеңіп алды. Бірінші орынға үш тілде еркін ән шырқаған оңтүстікқазақстандық та­лант Диана Хашимжанова лайық болса, екінші екі орын Тілек­бай Нығызбаев (Алматы) және Ерке­бұлан Тұрмағамбетовке (Астана) бұйырды. Үш үшінші орынды Марат Айтымбай (Оңтүстік Қазақстан облысы), Жалғас Сұлтанов (Астана) және Лаура Айтбаева (Қарағанды облысы) бөлісті. Облыс әкімінің арнайы жүлдесі Қытай Халық Республикасынан келген өнерпаз Асылхан Дәстүрге берілді. Сондай-ақ, Қырғызстаннан келген Биназира Абылаева да арнайы дипломмен марапатталды. Ретро-фестивальдің жабылу салтанатына қатысқан облыс әкімі Жансейіт Түймебаев сонау өткен ғасырдың жетпісінші жылдары Қазақстан жастарының ең сүйікті компазиторы болған Шәмшінің арада ғасыр өтсе де, әндерінің еш­қашан ескірмейтіндігін айтты. Соның жарқын бір дәлелі – Шәм­ші әндерін жанындай сүйіп, ерекше құрметтейтін бүгінгі жас­тар. Шәмшінің өршіл, рухты, нәзік лирикаға тұнған ғажап әндері қазақ халқына мәңгілік қызмет ете береді, деді облыс әкімі.  Бақтияр ТАЙЖАН, «Егемен Қазақстан» Оңтүстік Қазақстан облысы