Алматыда автобус жүргізушілері "Оңайды" алып тастауды талап етті

«Greеn Bus» ЖШС №30, 32, 121 бағдарындағы қоғамдық көлік жүргізушілерінің жұмысқа шығудан бас тартуына қатысты өз пікірлерін айтты, деп хабарлайды egemen.kz ҚазАқпаратқа сілтеме жасап. Аталған компания бас директоры Бауыржан Күлішевтің айтуынша, бүгін таңертең жанар-жағармай бекетінде апат болған, сондықтан бірнеше жүргізуші жұмысқа шығудан бас тартқан. «Бүгін рейске 65 адам шықпады. Олар күнделікті межелі жоспардың артып кеткеніне наразы. Жүргізушілер «Оңай» электронды құрылғысын алып тастауды талап етті. Бұл жүргізушілер «Оңай» жүйесі бойынша билет бермейді. Олар ақшаны қолға алып, қалтасына салады, бос билеттер береді. Олардың үстінен жолаушылар тарапынан жиі шағым түседі», - деді Б.Күлішев. Оның айтуынша, «Greеn Bus» ЖШС «Транспортный холдинг Алматы» ЖШС-імен бірге келтірілген шығынды есептеген. Екі ай ішінде 16 млн теңге шығын келген. «Бұл №30, 32, 121 бағдар жүргізушілерінің қалтасына салған ақшасы», - деді ол. «Бүгін рейске шықпаған жүргізушілерге сөгіс беріледі. Арнайы комиссия ары қарай не істеу керектігін шешеді», - деді компания директоры.