Азаматтық қорғаныс ахуалы талқыланды

Парламент Сенатының Халықаралық қатынастар, қорғаныс және қауіпсіздік комитетінің көшпелі отырысы өтті. Отырысқа сенатор, аталған комитет төрайымы Дариға Назарбаева жетекшілік етті. Басқосуда қолданыстағы «Аза­маттық қорғаныс туралы» Заңның қызметін жетілдіруге қатысты сөз қозғалды. – Бұл заң 2011 жылы төтенше жағдайға қарсы іс-қимыл сала­сын­дағы алты заңды біріктіру арқы­лы қабылданған болатын. Сол уақыттан бері құжат азаматтық қор­ғаныс саласының жұмысын рет­теуші құрал ретінде қызмет етіп келеді. Заман озып, адамның өмір сүру жағдайы оңалған сайын төтенше жағдайлардың алдын алуға қатысты ережелер де да­мып, жетілдіріліп отыруы керек. Қоғамда адам өмірінен құнды дүние болмауы тиіс. Ал азамат­тық қорғаныс дегеніміз, адам бала­сының өмірін сақтандыруға бағыт­талған жауапкершілік. Сол себептен қолданыстағы заңның жұмыс істеу тетіктері мен қызмет аясын сараптап, төтенше жағдай саласындағы мәселелерді шешуге кірісуіміз керек, – деді жиында Д.Назарбаева. Көшпелі отырыстың Алматыда өткізілуі де тегін емес. Биік тау баурайы мен сарқыраған өзен аңғарына қоныс тепкен қала – еліміз бойынша төтенше жағдай қаупі алдымен төнетін мекен. Әрі Жетісу жерінің сейсмикалық белсенділігі де өте жоғары. Дерек бойынша, Ала­таудың қос қапталында әр күн сайын жерасты тербелісі тіркеледі екен. Демек, Алматы тұрғындары үшін төтенше жағдай кезіндегі іс-әре­кеттердің маңыздылығы жоғары. Осы жиында мегаполистің азамат­тық қорғаныс саласының дайын­дығы таразыға салынып, жауапты тұлғалардың есептері тыңдалды. Сондай-ақ, сенаторлармен кездесуде от қаупі жоғары қалалар мен елді мекендердің қауіпсіздігін то­лық­тай қамтамасыз ету үшін әлі де 167 өрт сөндіру депосын салу қажет­тігі сөз болды. Ішкі істер минис­трінің орынбасары Юрий Ильиннің мəлімдеуінше, елімізде өрт қаупінен қорғану мақсатында соңғы жылдары 100-ден астам арнайы бекеттер ашылған. Қазір ел ау­мағында 423 өрт сөндіру бөлім­шелері жұмыс жасайды. Алайда, тілсіз жаумен күресте арнайы мамандар мен жабдықталған техника жетіспеушілігі күн тәртібінде тұр. Айтпақшы, тұрғындардың азаматтық қорғаныс саласы бойынша жедел желілерге жиі хабарласатыны байқалған. Мәселен, өткен ай аралығында «112» желісіне 3 638 799 рет телефон қоңырауы тіркеліпті. Ал Ішкі істер министрлігінің тө­тен­ше жағдай комитетінің құтқару бөлім­шелері 6,5 мың адамды түрлі әрекеттерден құтқарып, 40 000 адамды эвакуациялаған. Тағы 5000 адамға апат жағдайында медициналық көмек көрсетіліп, 11 рет шұғыл операция жасалған. Қалмаханбет МҰҚАМЕТҚАЛИ, «Егемен Қазақстан» АЛМАТЫ