«Көшпелілер ойындарының болашағы зор»

Қырғызстанның Шолпан-Ата қаласында ІІ Дүниежүзілік көшпелілер ойындарының өткеніне бір айдан астам уақыт болды. Енді оның қорытындысын ой елегінен қайта өткізіп алатын кез келді. Осыған орай, біз Мәдениет және спорт министрлігі спорт және денешынықтыру істері комитеті ұлттық спорт түрлері мен спорттағы мүмкіндігі шектеулі адамдармен жұмыс басқармасының басшысы Мақсат Қойшыбаевпен пікір алмасқан едік. – Дүниежүзілік көшпелілер ойындарын жақсы өтті деген пікір айтылып жатыр. Өзіңізге жарыс­ты ұйымдастыру несімен ұнады? – Ұйымдастыру жағы жақсы болды. Қырғызстанда жарысқа арнайы атшабар мен денешынықтыру кешені салыныпты. Жолдары да біраз жақсарыпты. Біздің делегация Ыстықкөлдегі пансионатта орналас­ты. Сол жерден жарыстарға барып тұрдық. – Қазақстан құрамасының дайын­дығы қандай болды? – Жарысқа бізден 95 спортшы қатысты. Онда спортшыларымыз 39 медаль алды. Бұлардың арасында 13 алтын, 13 күміс және 13 қола жүлде бар. Ал жарысқа 63 мемлекеттен өкілдер келгенін ескерсек, еліміздің командалық есепте үшінші орын алуы жаман нәтиже емес деп ойлаймын. Көшпелілер ойындарында екі балуанымыз қазақ күресінен, ерлер және әйелдер құрамасы тоғызқұмалақтан чемпион атанды. Сонымен бірге, екі отандасымыз аударыспақ пен алыштан, аламан бәйге, шәйгі шабыс пен тоғызқұмалақтан бас жүлдені жеңіп алды. Одан басқа, бес балуанымыз қазақ күресінен, үшеуі қырғыз күресінен бірінші орынды иеленді. Алыштан да балуандарымыз жақсы күресті. Бұл сында үш күміс жүлде алды. Біздің ерлер және әйелдер құрамасы мангала ойынын жақсы меңгеріп алыпты. Олар зияткерлік ойынның бұл түрінен екінші орынға ие болды. Сол сияқты аударыспақ, мас-рестилинг, гюлеш және аламан бәйгеде бір-бір медальдан алдық.  Спортшыларымыз қола жүлделерді де н­егізінен осы спорт түрлерінен иеленді. – Келесі Дүниежүзілік көшпе­лілер ойындары 2018 жылы өтеді екен. Оған қатысатын отандастарымыз көбейетін шығар? – Бұл жарыс – үлкен жоба. Оны «Көшпелілердің Олим­пиадасы» деу­ге де болады. Әзірге келесі Ойын­дар­дың қай жерде өтетіні белгісіз. Жарысты Қазақстан, Түркия, Әзербайжан және Қырғызстан ел­дерінің біреуі өткізуі мүмкін. Өйт­кені, осы елдердің басшылары ме­морандумға қол қойған болатын. Ал келесі жылы Ресейдің Ульянов облысында ТМД мемлекеттерінің ұлттық спорт түрлерінің фестивалі өтеді. Оған біздің ел де қатысады. Әңгімелескен Дастан КЕНЖАЛИН, «Егемен Қазақстан» АСТАНА