Суша сапырып, қоғаша жапырып

«Азаматтарға арналған үкімет» мемле­кет­тік корпорациясы коммерциялық емес акционерлік қоғамының облыстық филиалы – Жер кадастры және жылжы­майтын мүлікті техникалық тексеру департаментінің басшысы Ербол Әбдірах­манов парамен ұсталғанда, оған бағы­ныш­тылар арасында «е, бәсе, қашанғы талтаңдап жүре берсін, сазайын баяғы­да тарту керек еді» деушілердің көп бол­ғаны анық. Өйткені, ол осы мекемеге жетек­шілік еткен екі айдың ішінде кадр­ларды суша сапырып, қоғаша жапырып, әңгіртаяқ ойнатқан. Біріне жұмыстан шығарамын деп азу тісін ақситса, екін­шісіне қызмет бабы бойынша қамқор­лық жасайтынын айтып, қомақты пара та­лап еткен. Қостанай жақтағы былық-шылықтарын жасыру үшін бері қарай табан жалтырат­қаны жайлы кезінде БАҚ-тар жарыса жазған болатын. Жүрген жерін улатып-шулат­қан оны Қызылжар өңіріндегі техни­ка­лық түгендеу бюросына қалай басшы етіп жібергені түсініксіз. Ал білдей департаменттің құлағын ұстасымен әй-шәйға қарамастан 7 бөлім меңгерушісін төмендетіп, олардың орнына өзінің сөзін екі етпейтін «ләббайларды» жайғастырған. Аудандарда да осынша бөлім басшыларын қатардағы маман етіп жіберіп, сенімді «ізбасарларын» қонжитқан. Көмекейі кілкілдеп, жемсауы бүлкіл­деп тұратын Е.Әбдірахманов бұл жолы 250 мың теңге көлемінде пара алу үстінде құрықталды. Өзінің қылмыстық әрекеттері барысында заңсыз түрде 1,5 миллион теңге алғаны белгілі болды. Енді оны алда ауыр жаза күтіп тұр.  Өмір ЕСҚАЛИ, «Егемен Қазақстан» Солтүстік Қазақстан облысы