Өндіріс өрені

Мемлекет басшысының еңбек адамдары мен әулеттерін құрмет биігіне көтеру жөніндегі тапсырмасы еліміздегі еңбек ерлерін танытуды көздеген талай тың жобаларға түрткі болды. Денсаулық сақтау және әлеу­меттік даму министр­лігінің шаруашылық шеберлерін анықтау мақсатында ұйымдас­тырған «Еңбек жолы» байқауы да осы үдеден табылады. Сол сында «Өндірістің үздік жас маманы» аталымының жеңімпазы атанған Өскемендегі мыс зауыты анодты өндіріс цехының аға шебері Асхат Зикенов туралы әңгімелемекпіз. Шығыс өңірі бойынша «Жұмысшы жастардың үздік тәлімгері», «Өндірістің үздік жас маманы» және «Үздік еңбек әулеті» аталымдарында 40-тан астам қатысушы бақ сынады. Металлургтердің мәде­ниет үйінде өткен салтанатты рә­сімде «Қазмырыш» ЖШС ең­бек ресурстары басқармасы жас маманды жұмыстастарына үлгі етіп, қошемет көрсетті. Құт­тықтаулардан кейін жас маманға еңбек ресурстары бас­қар­масының мамандармен жұмыс жөніндегі қызметінің басшысы Елена Калацынская планшеттік компьютер сыйға тартты. Асхат осыдан 2 жыл бұ­рын зауытқа кен қорыту ма­те­риал­дарын дайындау цехы­ның тиеушісі болып келген болатын. Өз таңдауымен Өске­мен металлургиялық кешеніне бет бұрған 2014 жылдың 10 маусымы ерекше есте. «Металлургия және түсті металлургия» маман­дығы бойынша бакалаврды тәмамдаған жастың алдында екі жол тұр еді. Ертерек еңбек жо­лын бастап, өзін инженерлік тұр­ғыдан дамыту керек пе, әлде шетелдік жоғары оқу орын­дарының бірінде магистратурада оқыған жөн бе? Ол ойланбас­тан «Қазмырышты» таңдады. Се­бебі, өзі оқыған Д.Серікбаев атын­дағы Шығыс Қазақстан мем­­ле­кеттік техникалық универ­ситеті кафедрасының «Қазмы­рыш» ЖШС жанынан құрылған филиалы бар еді. Осында оқи жүріп, болашағын кәсіпорынмен сабақтастыруды көздеді. – Әдетте, оқу көп мәселені шешеді. Осы уақыт аралығында жұмыс істеп жүрген жерімнің алға қарышты қадам басып ке­ле жатқан қуатты кәсіпорын еке­ніне көзім жетті. Табысты болатыныма сенгендіктен зауытта қалуды жөн санадым. Кеше ғана оқу бітірген жас мамандар үшін үміт пен талап өте маңызды дүние. Талапты жастарды компания басшылығы қолдайды. Сон­дықтан мұнда мүмкіндіктер мол. Өндірістен қол үзбей, ма­гистра­тураны тәмамдадым. Жұ­мыс­тан кейін және демалыс күндері оқи жүріп, емтихандарымды жақсы тапсырдым, – деді А.Зикенов. Асхат жұмысқа орналасқан алғашқы сәттен бастап жаңа ортаға бейімделуге бар күшін салды. Ақыл-кеңес сұрауға қы­сыл­мады. Жанындағы жас­тардан, өндірістің ардагер­лерінен үздіксіз үйренген жас жігіт олардың көз алдында өсті. Тағылымдама барысында өзіне керекті дүниені алуға тырысқан ол әсіресе, қоры­ту материалдарын дайындау цехының бастығы Ермек Қизамет­динов, аталған цехтың шебері Вла­димир Савельев, қорғасын зауыты балқыту цехының бастығы Раджан Шыңғалиев көмектерін аянып қалмағанын айтады. Үш айдан кейін зауыттағы сарт-сұрт қайнаған еңбек майданына еті үйреніп, өзін еркін сезіне бастады. Осы ортаның қажетті бір бөлшегі екенін түйсінді. Бір жылдан соң шеберлер мектебін де тәмамдады. Мыс зауытының шетелдік әріптестерімен бірге өндірістік міндеттерді атқара жүріп, едел-жедел ағылшын тілін меңгеріп алды. Бірде ауысым шеберінің міндетін атқа­ру­шылықты жүктеген басшылық жас жігіттің жігерін байқап, басқа цехқа ауысуға ұсыныс жасады. – Өндірісте өзім атқаратын жұмыстың барлығына жетік едім. Бірақ, қол жеткізген жетіс­тікпен тоқтап қалмау қажет. Кәсіпорын өз-өзін өсіремін деген маманға мол мүмкіндік бе­реді, дейді ол. Үш тілді үздік меңгеріп, енді неміс тілін үй­рене бастапты. Алға қойған мақсатына жетпей қоймайтын қасиеті болар, Асхат жұмысшы ма­мандығын таңдау арқылы қазір­гі қоғамда жетістіктерге жету­ге болатынын сөзімен де, ісі­мен де дәлелдеп келеді. Осы шарада облыс әкімінің орынбасары Жақсылық Омар біліктілігі жоғары мамандар қай кезде де қажеттігін, сол себепті өндіріске лайықты мамандар тәрбиелеу керек екендігін атап өтіп, еңбексүйгіштік пен табандылықтың үлгісі ретінде Президентіміз Нұрсұлтан Назар­баевты айтуға болады. Егер адал еңбек етсеңіз, өмірде көп дү­ниеге қол жеткізе аласыз. Сон­дықтан Еңбек күнінің мәні ерекше, деді. Ал облыстық жұмыспен қам­ту және әлеуметтік бағдар­ла­ма­ларды үйлестіру басқарма­сының басшысы Елена Ста­ренкова адам еңбегінің қоғам­дағы мәртебесі мен маңы­зын көтеретін дәстүрлі бай­қау Мемлекет басшысының «Жалпыға Ортақ Еңбек Қоға­мы» идеясының шеңберінде еңбек өнімділігін жандандыру, жұмысшы кәсібінің мәртебесін көтеруді көздейтінін жеткізді. Әрине, күнде өзгеріп жат­қан технология да, қарышты ғы­лыми өрлеу де, қуатты өндіріс орындары да, барлық жетістік бастауында адам еңбегі, таланты һәм күш-жігері тұрғаны анық. Яғни, «Еңбек – бәрін жеңбек» деген осы. Думан АНАШ, «Егемен Қазақстан»   ӨСКЕМЕН