Орман, су, жер мәселелерін ортаға салды

Кеше өткен Орталық коммуникациялар қызметіндегі брифингте Ауыл шаруашылығы министрлігінің өкілдері орман-тоғайлардағы санитарлық кесу мен суармалы жерлердің айналымға қайтарылуы және Жер кодексіне енгізілетін өзгерістер мен толықтырулар туралы айтты. Жиын барысында негізгі спикердің бірі ретінде Ауыл шаруашылығы ми­нистрлігі Орман шаруашылығы жә­не жануарлар дүниесі комитеті төра­ғасының міндетін атқарушы Қайрат Үстеміров сөз сөйледі. Ол орман қоры алқаптарында қылқан жапырақты екпелерді санитарлық кесуге тыйым салудың себеп-салдарына кеңінен тоқталып, саладағы қазіргі ахуалды да баяндады. «Соңғы уақытта жапырақты және қылқан жапырақты шаруашылық бойынша сүрек дайындау көлемі орман пайдаланушылары мен орман иелері арасында игерілмей жатыр. Қолда бар деректерге сүйенсек, ағаш кесуде негізгі пайдалану көлемінің игерілмеуі орман пайдаланушылар мен орман иелерінің санитарлық кесуді тиімді деп санайтындығында болып отыр», деді Қ.Үстеміров. Мысалы, Шығыс Қазақстан облы­сында жыл сайын санитарлық кесу арқылы 80 мың текше метрге жуық сүрек дайындалады. Ал соңғы үш жылда Ақмола облысындағы санитарлық кесу көлемі 185,3 мың текше метрді құрады. Осының салдарынан 2004-2014 жылдар аралығында екпелер қоры азайып қалды. Санитарлық кесудің пайдалы болуы­ның себебі – орман пайдаланушылар сүрек дайындау шығынын азайту ар­қылы төлем сомасын да кемітпек. Бұл ретте олардың табысының артатыны түсінікті. Комитет төрағасының міндетін атқарушы қылқан жапырақты екпелерді санитарлық кесуге тыйым салу мәселесі Парламент пен Үкімет деңгейінде талқыға түсіп жатқанын да жеткізді. Басқосуда министрлікке қарасты Жер ресурстарын басқару комитеті төрағасының міндетін атқарушы Гүл­жа­һан Бимендина сөз сөйлеп, Жер кодек­сіне енгізілетін өзгерістер мен осы ба­ғытта қолға алынған шаралардың барысы және жеке тұрғын үй құрылысы үшін он сотық жер телімін беру мәселесіне айрықша тоқталды. «Ел азаматтарын он сотық жер телімімен қамтамасыз ету­дегі басты мәселелердің бірі – елді ме­кендер аумағында бос жерлердің бол­мауы. Ал бұған дейін қамтылған жер­лерді алу мәселесі ағымдағы заң­намада қарастырылмаған. Осы ретте, жаңа заңнамада халық сұранысына сәй­кес жеке тұрғын үй құрылысы үшін жер телімдерін мемлекеттік қажет­тілік­ке жатқызу қарастырылуда», деді Г.Би­мендина. Сонымен қатар, ол ауыл ша­руашылығы мақсатындағы жерлер­ді пайдаланудың заңдылығын тексеру барысында 3 мыңға жуық заң бұзу­шылықтардың анықталғанын және ол жерлердің мемлекетке қайтарылатынын сөз етті. Шара барысында Су ресурстары комитеті төрағасы Ислам Әбішев суармалы жерлердің айналымға қайтарылуы туралы әңгімеледі. Оның айтуынша, 2017-2021 жылдар аралығында 610 мың гектар аумақтағы суармалы жерлердің ирригациялық жүйелерін қайта қалпына келтіру көзделуде. «Бұл аумақтар елі­міздің 11 облысында орналасқан. Қайта қал­пына келтіру жұмыстарына 326 мил­лиард теңге шамасында қаражат қажет. Қазіргі дағдарыс уақытында бұл, әрине, үлкен сома. Сондықтан, атал­ған мәселені халықаралық қаржы орта­лықт­ары арқылы шешуді жоспарлап отырмыз. Бұл бағытта біршама жұмыстарды ат­қарып та үлгердік, нақты шаралар сәуір-мамыр айларында басталады», деді ол. Брифингте Ауыл шаруашылығы министрлігі өкілдері журналистердің сауалдарына жан-жақты жауап берді. Асхат РАЙҚҰЛ, «Егемен Қазақстан»