Ұлттық брендке дауыс беру уақыты ұзартылды

Ұлттық брендті анықтау жөніндегі байқауға дауыс беру 12 қарашаға дейін ұзартылды, деп хабарлайды egemen.kz ҚР Ақпарат және коммуникациялар министрі Дәурен Абаевтың facebook-тегі парақшасына сілтеме жасап. "Азаматтардан өтініштердің көптеп түсуіне байланысты, Ұлттық брендті анықтау жөніндегі байқаудың ұйымдастыру комитеті дауыс беруді тағы 10 күнге, 12 қарашаға дейін ұзарту жөнінде шешім қабылдады. Жұмыстарды қабылдау кезеңінде де мерзімнің ұзартылғаны белгілі. Барлық өтінімнің 70%-ы осыдан кейін келіп түскен болатын. Қазірдің өзінде 66 мыңнан астам адам дауыс беріп үлгерді", - деп жазды Дәурен Абаев. Сонымен қатар Министр байқауды жалпыұлттық сипатта өткізу талабының басты орында тұрғанын жеткізді. Ал көпшіліктің байқауға кәсіби мамандарды қатыстыру керек деген пікірі бұл сипатқа қайшы келетінін түсіндірді. "Күні ертең елімізде де, сонымен қатар, сырт елдерде де қолдануға лайықты брендті таңдау аса маңызды болғандықтан, біз қазақстандықтардың өздеріне тікелей қатысуға да, үздік жұмысты таңдауға да мүмкіндік беріп отырмыз. Идеяларды іріктейтін Сарапшылар кеңесіне, яғни екінші кезеңге кемінде 5 жұмыс жіберіледі. Демек, олардың саны 10 болуы да, 20 болуы да мүмкін. Бұл - үміткерлердің көпшілігінің жеңімпаз атану үшін бәсекелесуге мүмкіндігі бар деген сөз", - деді Министр.