Кәсіби біліктілік пен тәжірибе – ең шешуші факторлар

Биылғы Жолдауда «Бақ берерде елге ырыс қонады, ұстан­ған жолы дұрыс болады» деген даналық сөз бар. Ал ырыс-бе­реке, ынтымақ бар жерде ғана тұрақтайтындығы сөзсіз. Бүгін­гі таңда экономикасы қарқынды дамыған кең байтақ еліміздің үлкен табыстары ең алдымен, қазақстандықтардың тату-тәтті тіршілігіне, ынтымақтастығы­на тығыз байланысты екендігі айдай ақиқат. Қалыптасқан тұрақ­тылық пен келісімді одан әрі нығайту да, жас ұрпақ бойында туған Отанға деген сүйіс­пенші­лікті қалыптас­ты­ру­да ұстаздар қауымына жүкте­летін міндет пен жауапкершілік мол екендігі айтпаса да түсінікті. Сонымен қатар, Жолдауда «Енді он жылдан кейін мектеп бітірушілердің 100 пайызы мем­ле­кеттік тілді біліп шығатын болады», деп атап көрсетілуінің маңызы зор. Соған орай, Алма­ты қаласындағы №45 орыс орта мектебінің ұстаздар ұжымы бұл бағыттағы жұмысты одан әрі жетілдіре түсуде. Мектеп оқу­шыларының мемлекеттік тіл – қазақ тілін меңгеру, оған деген құрметі мен құштарлығын арт­ты­ру мақсатында бірқатар іс-ша­ралар жүзеге асырылуда. Оқу­шылар арасында, әсіресе, пат­риоттық тақырыпқа арнал­ған ән байқауларын ұйымдастыру өз нәтижесін беруде. Мемлекеттік тілде ән шырқау олардың қазақ тілін мүмкіндігінше тез уақыт­та үйренуіне көмектесуде. Мә­се­лен, Тәуелсіздік күніне арна­лып өткізілген ән байқауына жо­ға­ры сыныптағылар ғана емес, бірінші сынып оқушылары да қа­тысып, сыннан сүрінбей өткен­дігі құптарлық жәйт. Бұл орайда өз шәкірттерін ән байқауына дай­ындауда ерекше белсенділік та­ныт­қан ұстаздар да аз емес. Сөз реті келгенде атап ай­тарлығы, оңтүстік астанадағы №45 орыс орта мектебінде қазіргі кезеңде 508 оқушы білім алуда. Олардың арасында 75 оқушы балалар үйінде тәрбиеленетін, ата-анасы жоқ жетімдер. Сонымен қатар, психологиялық дамуы кідіріске ұшыраған, тежелген бас­тауыш сынып оқушылары да бар. Бір құптарлығы – олардың бар­лы­ғы мемлекет қамқорлығына алынған, мектеп оқушыларына Ал­маты қалалық әкімдігі, қала­лық білім беру басқармасы да кө­мек қолын созып келеді. Дегенмен, «жетім қозы тасбауыр» демекші, ұстаздар ұжымы да тағ­дыр қатыгездігіне тап болған шәкірттерінің болашақта еліне адал қызмет ететін азамат болып өсуіне ықпал етуде. Білім ұясында Алматы қала­лық білім беру басқармасының бұйрығымен таңертеңгілік жүйе­лі түрде дене шынықтыру сағаты өткізіледі. Содан соң міндетті түрде Қазақстан Рес­публикасы­ның Әнұраны шыр­қалады. Мемлекеттік әнұранды жаттап алып қана қоймай, оның мағынасын түсінуге талпыну­шылар қатары аз емес. Білім беру жүйесіндегі жас ұрпаққа сапалы білім, сана­лы тәрбие беру ең басты қажет­тілік десек, бұл орайда ұстаз­дардың кәсіби біліктілігі мен жинақтаған мол тәжірибесі шешуші фактор екендігі талас ту­дырмайды. Сон­дықтан да, мұн­да мектеп мұғалімдерінің өз ісіне деген жауапкершілігін, кәсі­би біліктілігін жетілдіруге бас­ты назар аударылған. Сол себептен де, кейбір тәжірибелі ма­мандар жас мамандарға ақыл-кеңесін айтып, ой бөліседі. Биылғы жылы ұжым үшін ерекше жыл, өйткені биыл №45 орыс орта мектебінің құ­рыл­ғанына отыз жыл толмақ. Алғашқы кезде бұл мектеп қала бойынша оқушылардың білім сапасы жағынан жоғары орын­дардан көрініп келсе, өкінішке қарай, арада біраз уақыт өте келе сол биік меже төмендеп кетті. Сондықтан да, келешекте сол мәртебеге қайта көтерілу үшін ұжым мүшелері – мұға­лімдер бүгінде ізденіс пен іскер­ліктің үлгісін көрсетуге ұмтылуда. Бағила ЖОЛТАЕВА, №45 орта мектептің директоры. Алматы.